I kare ma Yecu oto, dano mo ma lalonyo ma nyinge Yucepu openyo Pilato pi twero me kwanyo kom Yecu ki i yat. Yucepu oboyo kom Yecu ki bongo camanini dok owiro kome ki moo ma ngwece kur ci opyelo i lyel manyen ka dong ongilo got madit oloro ki dog lyel. Lulamdog madito guwaco bot Pilato ni: ‘Walworo ni lupwonnye pa Yecu gubikwalo kome ka dong giwaco bot lwak ni en ocer woko.’ Pi meno, Pilato owaco botgi ni: ‘Wumwon dog lyel woko ci wuket lukur piny me gwokone.’

I nge nino adek, mon mogo gucito i lyel odiko con ci gunongo ni kidiro got woko cen ki i dog lyel. Lamalaika ma obedo i i lyel owaco bot mon-ni ni: ‘Pe wulwor. Yecu ocer woko. Wucit wuwac bot lupwonnyene ni gurwatte kwede i Galilaya.’

Maliam Lamagdala orune ka yenyo Petero ki Jon. En owaco botgi ni: ‘Ngat mo okwanyo kom Yecu woko!’ Petero ki Jon guringo gucito i lyel. I kare ma gunongo lyel odong nono, gudok cen i pacigi.

I kare ma Maliam odok cen i lyel, en oneno lumalaika aryo i iye ci owaco botgi ni: ‘Pe angeyo ka ma kitero Rwoda iye.’ Maliam oneno laco mo, ci otamo ni gwok nyo en lapur-poto, pi meno owaco bote ni: ‘Ladit, titta ka ma itero iye Yecu.’ Ento i kare ma laco-ni owaco ni, “Maliam!” en otugi niang ni man Yecu. En okok ni: “Lapwony,” ci omako Yecu matek. Yecu owaco bote ni: ‘Cit bot omegina itittigi ni inena.’ Cutcut, Maliam ongweco bot lupwonnye ci owaco botgi ni eneno Yecu.

Lacen i nino meno kikome, lupwonnye aryo onongo gitye ka wot ki i Jerucalem me cito Emau. Laco mo ocako wot kwedgi i yo ci openyogi ni gitye ka loko lok ango. Gudok iye ni: ‘Peya iwinyo gin mutimme? Nino adek angec, lulamdog madito guneko Yecu woko. Ento mon mogo gitye ka wacci en kwo!’ Laco-ni openyogi ni: ‘Wun mono pe wuye lok pa lunebi ce? Gin guwaco ni Kricito bito ka dok bicer.’ En omedde ki gonyo te  Ginacoya botgi. I kare ma guo Emau, lupwonnye magi gupenyo laco-ni ni obin obed botgi. Dong, i kare ma gitye i dog cam, en omako mugati, opwoyo ci guniang ni en kara Yecu. Ci cutcut en orweny woko ki botgi.

Lupwonnye aryo-ni gurune gudok cen i Jerucalem, i ot ma lukwena onongo gucokke iye, ci gutito botgi gin mutimme. I kare ma gitye i ot, Yecu onyutte botgi ducu. I acakkine, lukwena onongo pe gitwero ye ni meno Yecu. Ka dong en owaco botgi ni: ‘Wunen cinga; wugud koma. Yam kicoyo ni Kricito bicer ki i kin jo muto.’