Jesusajj jiwjjäna ukhajja, José sat qamiri jaqew Jesusan cuerpop lawat apaqjjañatakejj Pilator permiso mayïna. Jupajj linot lurat suma telanakampiw llawuntäna, suma olorani qollanakampiw ucharakïna, ukatjja machaq sepulturaruw imtʼjjäna. Mä jachʼa qalampiw punkut atkatayäna. Jilïr sacerdotenakajj Pilator akham sapjjänwa: ‘Jesusan discipulonakapaw jutasin cuerpop lunthatapjjaspa, ukatsti “jaktjjewa” sasaw parlapjjaspa’ sasa. Ukatwa Pilatojj akham säna: “Aka guardianakamp sarapjjam, wali sum uñjanipjjarakim” sasa.

Kimsïr urunwa mä qhawqha warminakajj sepultur uñjiri alwat sarapjjäna. Jachʼa qalajj sepultura punkut ateqatäjjänwa. Sepultura manqhanjja, mä angelaw warminakar akham säna: ‘Jan ajjsarapjjamti. Jesusajj jaktjjewa. Discipulonakar yatiyanipjjam, Jesusampi jikisiñatakejj Galilear sarapjjpan’ sasa.

María Magdalenajj jankʼakiw Pedrompir Juanampir yatiyir saräna. Jupanakar sarakïnwa: ‘Jesusan cuerpopajj chhaqatawa, khitipun apasjjchi’ sasa. Pedrompi Juanampejj tʼijukamaw sepulturar sarapjjäna. Chʼusaki uñjasajj utanakaparuw kuttʼjjapjjäna.

Mariajj sepulturaruw kuttʼäna. Uka manqhanjja pä angelanak uñjäna, jupanakar sarakïnwa: ‘Janiw Jesusan cuerpop kawkir apapjjatapsa yatkti’ sasa. Ukhamaruw mä jaqer uñjäna, jardineröpachawa sasin amuyasaw akham säna: ‘Tata, mirä amp suma, kawkirus uchanta uk awistʼakitaya’ sasa. Uka jaqejj “¡María!” sasaw säna, ukhakiw Jesusätap amuyäna. Ukatwa “¡Yatichiri!” sasin katuntasïna. Jesusajj sarakïnwa: ‘Nayar uñjatam jilanakajar yatiyanim’ sasa. Mariajj iyaw sasaw tʼijüna, Jesusar uñjatapwa discipulonakar yatiyarakïna.

Jaypʼu toqerojj Jesusan pä discipulopaw Jerusalenat Emaús markar sarasipkäna. Mä jaqew jupanakamp chik sarañ qalltasajj akham jisktʼäna: ‘¿Kuna toqetsa parlasipkta?’ sasa. Jupanakajj sapjjarakïnwa: ‘¿Kunatï paski uk janit yatkta? Kimsa urunak nayrakiw jilïr sacerdotenakajj Jesusar jiwayapjjañapatak katuntayapjje. Jichhajj mä qhawqha warminakaw Jesusajj jakaskiwa sasin parlasipki’ sasa. Uka jaqejj akham sasaw jupanakar jisktʼäna: ‘¿Janit profetanakan arunakap  creyipkta? Cristojj “jiwayatäniwa, ukatsti jaktayatarakïniwa” sasaw sapjjäna’ sasa. Uka jaqejj Qellqatanakatwa jupanakar qhanañchäna. Emaús markar puripjjäna ukhajja, discipulonakajj jupanakampi quedasiñapatakiw uka jaqer mayipjjäna. Uka jaqejj jaypʼu toqer tʼantʼa manqtʼasiñatakiw oración luräna, ukhakiw Jesusätap amuyapjjäna. Ukatsti Jesusajj chhaqtawayjjänwa.

Uka pä discipulonakajj tʼijukamaw Jerusalenar sarapjjäna. Apostolonakajj tantachasipkäna ukar purisaw kunatï paskäna uk yatiyapjjäna. Uta manqhankasipkäna ukhamaruw Jesusajj uñstäna. Qalltanjja janiw Jesusätap creyipkänti. Ukatwa Jesusajj jupanakar akham säna: ‘Amparanakaj uñjapjjeta, llamktʼapjjarakita. Cristojj jiwatanak taypit jaktayatäniwa sasin qellqatawa’ sasa.