Lit kalak bayak si gelarna Jusup. Kenca Jesus mate, mindo Jusup man Pilatus gelah banci ipenusurna mayat Jesus arah tiang nari. Ibalutina mayat Jesus alu uis linen ras rempah-rempah si merim, nce itamakenna mayat e ku kuburen si mbaru. Igulingken ka batu si galang guna nutupi kuburen e. Nina imam-imam kepala man Pilatus, ‘Ula sempat lit murid Jesus muat mayatna bas kuburen nari, nce katakenna Jesus nggo nggeluh mulihi.’ Nina Pilatus, ‘Ban kena gelah ulanai tertalangi kuburen e, ras ban penjaga i je.’

Kenca telu wari, sanga erpagi-pagi, lit piga-piga diberu si reh ku kuburen e. Idah kalak e me maka nggo talang kuburen e. I bas kuburen e, lit sada malekat si ngerana man diberu ndai, nina, ‘Ula kam mbiar. Jesus nggo ipekeke. Kataken man murid-muridna gelah ijumpaina ia i Galilea.’

Maria Magdalena mis lawes njumpai Petrus ras Johanes. Nina man kalak e, ‘Lit si muat mayat Jesus!’ Petrus ras Johanes pe mis lawes ku kuburen. Sanga idahna kuburen e kosong, mulih ka kalak e ku rumah.

Maria reh ka ku kuburen e. Sanga ia seh i je, idahna dua malekat i bas, janah nina Maria, ‘Ku ja nge ibaba kalak e mayat Tuanku.’ Kenca si e, idahna ka i darat lit sekalak dilaki, iakapna dilaki e tukang kebun. Sungkun Maria ia, ‘Pak, katakenndu min ku ja babandu ia.’ Nce, ilebuh dilaki e ia, “Maria!” Mis ieteh Maria maka e Jesus. Serko Maria, nina, “Guru!” nce itagangina Jesus. Nina Jesus man Maria, ‘Kataken man senina-seninaku, nggo idahndu aku.’ Mis Maria kiam ndahi murid-murid gelah ngataken nggo jumpa ia ras Jesus.

Kenca si e, lit dua murid Jesus si erdalan arah Jerusalem nari ku Emaus. Bas perdalanen, jumpa kalak e ras sekalak dilaki. Nce, isungkunna kai si icakapken kalak e. Nina kalak e, ‘Lenga tehndu? Telu wari si lewat, nggo ibunuh imam-imam kepala si Jesus. Tapi lit diberu-diberu si ngataken ia nggeluh denga!’ Isungkun dilaki e ka me, ‘La kena tek man nabi-nabi? Me ikatakenna, Jesus mate nge pagi ras ipekeke.’ Nce, ijelaskenna ayat-ayat man kalak e. Sanga seh kalak e i Emaus, iajak murid-murid e ia. Bas man berngi, itotokenna pangan kalak e. Jenari, ieteh kalak e me maka ia Jesus. Nce, rempet ia bene.

Murid-murid e pe mis lawes ku sada rumah i Jerusalem. Nggo pulung rasul-rasul i je. Ijelasken kalak e me kai si nggo terjadi. Sanga i bas rumah e denga, rempet lit Jesus i je. Tangtangna, rasul-rasul e la tek adi si idahna e Jesus. Emaka nina Jesus man kalak e, ‘Nen min tanku e, tagangi min. Me lit tertulis, Kristus ipekeke pagi kenca mate.’