Mvus awu Yésus, nkukume môt ô mbe jôé na Joseph, ô nga ke ja’é Pilate mbime Yésus. Joseph a nga wo’o mbime Yésus mimbon mi ne mbamba menyum, a kele fe jame wô mfefé soñ. Beta ako’o a mbe a dibe soñ éte. Bivete bepretre bi nga jô Pilate na: ‘Bia ko wôñe na beyé’é be Yésus be ke wub mbime wé, asu na be du’u bôte na a wômôya.’ Nde Pilate a nga jô be na: ‘Kelané fete soñ éte, a kômané ba’ale je.’

Mvus melu melal, binga béziñe be nga kune ke soñe Yésus; ateme na soñ é yoo ne ngeññ. Ane be nga wô’ô ange a jô’ô be na: ‘Te mia ko woñ. Yésus a wômôya. Kelané kate beyé’é bé na be ke tôbane nye e Galilée.’

Marie Madeleine a nga ji’a ke jeñe Pierre ba Jean. Nde a nga jô be na: ‘Môt éziñ a zuya nyoñ mbime Yésus!’ Pierre ba Jean ve zu bumu mimbil, a bulan e soñ. Éyoñ be nga koone soñ é too ékôkoé, be nga bulane menda map.

Éyoñ Marie a nga beta ke soñ a nga yen beange bebaé soñ été, ane a nga jô be na: ‘Me nji yeme vôm ba te kee Tate wom.’ Ane a nga yene môt éziñ, a buni’i na a ne mbé mesam; nde a nga jô nye na: ‘Éngôngol, kate ma vôm wo te kee nye.’ Ve éyoñ môt ate a nga jô na “A Marie!” ane a nga yeme na a mbe Yésus. Nde a nga wubane nye, a jô nye na: “A Ñye’ele!” Ane Yésus a nga jô nye na: ‘Kele’e kate bobenyañ bam na wo te yene ma.’ Marie ve zu bumu mbil, a ke kate beyé’é na a te yene Yésus.

Mame ngô’é, beyé’é bé bebaé be nga kôlô Jérusalem a ke Emmaüs. Ane môt éziñ a nga zu tobane be, a sili be jam be mbe be laan. Nde be nga jô nye na: ‘Ye wo yeme ki jam da te boban? Bivete beprêtre bi nga wôé Yésus den a nto melu melal. Éyoñe ji ki, biñga béziñ ba jô na a wômôya!’ Ane môt ate a nga sili be na: ‘Ye mi nji buni mam bekuli mejô be nga jô? Be nga jô  na Krist a ye wu, éyoñ éte aye beta wômô.’ A nga ke ôsu a timine be Mejô me Zambe. Éyoñ be nga kui Emmaüs, nde be nga jô môt ate na a tôñe be. Éyoñe môt ate a maneya ye’elan ôsusu’a na ba di, nde be nga yeme na a ne Yésus. Ane a nga jañe be mis.

Ane beyé’é bebaé ba, be nga ji’a ke Jérusalem, vôm minlôman mi nga sulan, a kate be mam me nga boban. Éyoñ be kuiya wôé, ane Yésus a nga yené be be nda be nga too. Minlôman mi mbe fe’e ne vema éyoñe be nga yene Yésus. Ane Yésus a nga jô be na: ‘Tamané fombô mo mam; nambané me. E mbe ntilane na Krist a ye wômô miñwuan.’