Apre ki Zezi ti’n mor, en zonm ris ki apel Zozef ti demann Pilat pour tir lekor Zezi lo poto. Zozef ti anvlop sa lekor dan en latwal linenn fen avek bann zepis santi bon e i ti met li dan latonm. I ti demann bann dimoun pour roul en gro ros dan larantre sa latonm. Bann sef pret ti dir Pilat: ‘Nou per pangar serten disip Zezi i pran son lekor e apre zot dir ki i’n resisite.’ Alor Pilat ti dir zot: “Sel sa ros e met en gard veye.”

Trwa zour pli tar, byen granmaten, serten madanm ti al kot latonm e zot ti vwar ki sa ros ti’n ganny tire. Dan latonm, en lanz ti dir sa bann madanm: ‘Pa bezwen per. Zezi in ganny resisite. Al dir son bann disip ki zot pou vwar li Galile.’

Mari Magdalenn ti degaze pour al rod Pyer ek Zan. I ti dir zot: ‘En dimoun in pran lekor Zezi!’ Pyer ek Zan ti taye pour al kot latonm. Ler zot ti vwar latonm vid, zot ti retourn kot zot.

Ler Mari ti retourn kot latonm, i ti vwar de lanz anndan. I ti dir zot: ‘Mon pa konnen kote zot in met lekor mon Senyer.’ Apre i ti vwar en lot zonm ki i ti krwar i en zardinyen e i ti dir li: ‘Silvouple msye, dir mwan kot ou’n met son lekor.’ Me ler sa zonm ti dir, “Mari!” i ti konnen ki i ti Zezi. I ti kriye: “Ansenyan!” e i ti tyonbo li. Me Zezi ti dir li: ‘Al dir mon bann frer ki ou’n vwar mwan.’ Deswit Mari ti tay kot bann disip e i ti dir zot ki i ti’n vwar Zezi.

Pli tar dan lazournen, de disip sorti Zerizalenm ti pe al Emais. En zonm ti zwenn zot lo semen e demann zot ki zot ti pe koz lo la. Zot ti dir: ‘Ou pa’n tande? Trwa zour pase, bann sef pret ti met Zezi amor. La serten madanm pe dir ki i vivan!’ Sa zonm ti demann zot: ‘Zot pa krwar bann profet? Zot ti dir ki Kris ti pou mor e resisite.’ I ti kontinyen eksplik zot Lekritir. Ler zot ti ariv  Emais, sa de disip ti demann li pour reste avek zot. Ler zot ti pe al manze, i ti priye e zot ti realize ki i ti Zezi. Apre i ti disparet.

Sa de disip ti degaze pour al Zerizalenm kot bann zapot ti’n rasanble e zot ti rakont sa ki ti’n arive. Ler zot ti laba dan sa lakaz, Zezi ti aparet avek zot tou. Premye kou bann zapot pa ti oule krwar ki sa ti Zezi. Alor i ti dir zot: ‘Get mon lanmen e tous mwan. I’n ganny ekrir ki Kris pou resisite.’