Ke Jesus ama akakpa, imọ owo emi ekekerede Joseph ama ọkọdọhọ Pilate ete ayak ikọkọn̄ọde okpo Jesus ikobụk. Enye ama ada ata eti ọfọn̄ emi ẹduọkde ufuọn̄n̄kpọ awan̄ okpo oro esịn ke obufa udi, onyụn̄ anam ẹkpat itiat ẹberi ke inua udi oro. Mbọn̄ oku ẹma ẹdọhọ Pilate ẹte: ‘Etie nnyịn nte ndusụk mbet Jesus ẹmọn̄ ẹkesio okpo esie ẹnyụn̄ ẹdọhọ ke enye ama eset.’ Pilate ama ọdọhọ mmọ ẹkekpeme udi oro, ẹkûyak owo odụk.

Ke ọyọhọ usen ita, ndusụk iban ẹma ẹbabak ẹka udi ẹkekụt ke ẹma ẹkpat itiat ẹsio ke udi oro. Angel kiet ke esịt udi oro ama ọdọhọ mmọ ete: ‘Ẹkûkop ndịk. Ẹma ẹnam Jesus eset. Ẹkedọhọ mbet esie ẹka Galilee ẹkekụt enye.’

Edi mbemiso iban oro ẹkụtde angel, Mary Magdalene ama efefehe aka nditịn̄ se itịbede nnọ Peter ye John. Enye ama ọkọdọhọ mmọ ete: ‘Owo ama ekeyịp okpo Jesus!’ Peter ye John ẹma ẹfehe ẹka udi ndise. Mmọ ẹma ẹkekụt ke udi ana ukpọk, ẹnyụn̄ ẹfiak ẹnyọn̄ọ ufọk mmọ.

Ini Mary akafiakde ekesịm udi, enye ama okụt angel iba ke esịt udi oro onyụn̄ ọdọhọ mmọ ete: ‘Ndiọn̄ọke itie emi ẹmende Ọbọn̄ mi ẹkenịm.’ Ekem enye ama okụt owo emi enye ekekerede ke edi ekpeme in̄wan̄, onyụn̄ ọdọhọ owo oro ete: ‘Ete, mbọk teme mi ebiet emi ekemende enye ekenịm.’ Edi ini ete oro okotde enye, “Mary!” ke enye ọkọdiọn̄ọ ke Jesus ke edi. Enye ama ofiori ete: “Andikpep!” onyụn̄ omụm Jesus. Jesus ama ọdọhọ ete: ‘Ka kọdọhọ nditọete mi ke imokụt mi.’ Mary ama efehe inikiet inikiet ọkọdọhọ mbet Jesus ke imokụt enye.

Ekem, kpa usen oro, mbet Jesus iba ẹma ẹto Jerusalem ẹka Emmaus. Nte mmọ ẹsụk ẹkade ke usụn̄, owo kiet ama editiene mmọ asan̄a, onyụn̄ obụp mmọ m̀mê nso ke mmọ ẹneneme. Mmọ ẹma ẹdọhọ ẹte: ‘Ndi ukopke ofụri se itịbede emi? Usen ita emi ebede, mbọn̄ oku ẹma ẹwot Jesus. Edi ndusụk iban ẹdọhọ ke enye eset!’ Ete oro ama obụp mmọ ete: ‘Ndi mbufo inịmke se  mme prọfet ẹketịn̄de? Mmọ ẹkedọhọ ke ẹyewot Christ, ekem ke ẹyenam enye eset.’ Enye ama aka iso anam N̄wed Abasi an̄wan̄a mmọ. Ke mmọ ẹma ẹkesịm Emmaus, mbet iba oro ẹma ẹdọhọ enye etiene mmimọ edi ufọk emi ikade. Ke owo oro ama ọkọbọn̄ akam ọdiọn̄ udia mbubreyo emi mmọ ẹkeyomde ndidia, ke mmọ ẹkediọn̄ọ ke Jesus ke edi. Kpa idahaoro, Jesus ama osop mmọ ke enyịn.

Mbet iba oro ẹma ẹsọsọp ẹka ufọk emi mme apostle ẹkesopde idem ke Jerusalem ẹketịn̄ se iketịbede ẹnọ mmọ. Nte mmọ ẹsụk ẹtịn̄de, Jesus ama owụt kpukpru mmọ idem. Akpa, mme apostle ikenịmke ke Jesus ke edi. Ntre Jesus ama ọdọhọ mmọ ete: ‘Ẹse mi ubọk; ẹtụk mi ẹse. Ẹma ẹwewet ẹte ke ẹyenam Christ ẹset.’