Nach em Tod vo Jesus gaht en riiche Maa, wo Joseph heisst, zum Pilatus und fragt ihn, öb er de Körper vo Jesus dörf vom Pfahl obe abe eh. De Joseph wicklet de Körper vo Jesus zäme mit Gwürz in es fiins Liinetuech. Er leit ihn in es neus Grab und laat en schwere Stei vor de Iigang rolle. D Oberprieschter säged zum Pilatus: «Mir wend nid öppe, dass d Jünger vo Jesus de Körper vo ihm stehled und denn behaupted, er lebi wider.» Drum git de Pilatus de Befehl: «Mached s Grab zue, tüends miteme Sigel sichere und lönds la bewache.»

Drü Täg später, am Morge früeh, göhnd es paar Fraue zum Grab und gsehnd, dass de Stei weggrollt worde isch. Wo si is Grab inegöhnd, seit en Engel: «Ihr müend kei Angscht ha. Jesus isch uferweckt worde. Göhnd und säged sine Jünger, dass si ihn z Galiläa treffe werded.»

Aber unterdesse isch d Maria Magdalene scho zum Petrus und Johannes gsprunge und verzellt ihne: «Irgendöpper het de Körper vo Jesus weggno!» De Petrus und de Johannes renned grad zum Grab. Wo si aber gsehnd, dass es leer isch, göhnd si wider hei.

Wo d Maria wider zrugg zum Grab chunnt, gseht si zwei Engel im Grab inne und seit zu ihne: «Ich weiss nid, wo si min Herr hiibracht hend.» Si gseht denn en Maa und meint, es seig de Gärtner. Si seit zu ihm: «Herr, säg mir doch, wo du ihn hiibracht hesch.» Wo er aber «Maria!» zu ihre seit, merkt si, dass es Jesus isch. Si rüeft: «Lehrer!», und chlammeret sich a ihn. Jesus seit zu ihre: «Gang zu mine Brüedere und verzell ihne, dass du mich gseh hesch.» D Maria springt sofort los und verzellt de Jünger, dass si Jesus gseh het.

E chli später am gliiche Tag laufed zwei Jünger vo Jerusalem uf Emmaus. Unterwegs spricht si en Maa a und fragt, was si mitenand reded. Truurig säged si: «Hesch nid ghört, was passiert isch? Vor drü Täg hend d Oberprieschter Jesus töted. Und jetzt verzelled es paar Fraue, dass er wider lebt.» De Maa fragt si: «Glaubed ihr de Prophete nid? Si hend doch gseit, dass de Chrischtus wird sterbe und au wider uferweckt wird.» Er erklärt ihne denn d Schrifte ganz genau. Wo si fascht in Emmaus achömmed, bitted si de Maa, dass er bi ihne bliibt. Bim Znacht betet er und teilt s Brot in Stückli. Da merked si, dass es Jesus isch. Aber denn isch er plötzlich verschwunde.

Di zwei Jünger göhnd schnell wider uf Jerusalem zrugg und verzelled de Aposchtel, was passiert isch. Wo si alli zäme imene Huus sind, zeigt sich Jesus ihne. D Aposchtel glaubed nid, dass es Jesus isch. Er seit: «Lueged mini Händ a und langed mich a. I de Schrifte staht doch, dass de Chrischtus vo de Tote wird uferstah.»