Süchikijee outuin Jesuu, oʼunushi wanee wayuu washirü kanüliakai José nümaʼanamüin Pilato. Nuchuntaka José nümüin Pilato süpüla nüshakatirüin müliashii. Nükoʼoloka Jesuu süka wanee kuluulu anasü maʼin kanüliasü liino. Nushuleraka wanee wunuʼu jemeta eejuu naaʼu. Niʼitaaka nia suluʼu tü woowirakat sünain nüsürülüin shia süka wanee ipa miyoʼu. «Wainmajüsü waaʼin suulia süntajüin tü nikirajüinkalüirua sünain suʼluwajüin müliashii süpüla naküjüinjatüin süsoʼiraaitpain naaʼin süchikijee ouktaa», namaka nümüin Pilato na laülaashiikana napüleerua na sacerdootekana. «Jiʼitaa waneeinnua surulaat süpüla neʼrajüinjatüin saaʼu tü woowirakat», nümaka Pilato namüin.

Apünüin kaʼi süchikijee tia, antüsü wanee jieyuu wattaʼa maalü sünain anaʼlawaa sümüin tü woowirakat. Ainküsü neʼe naaʼin süka neʼrüin jutatüin tü shirousekat. Eejachi napüla wanee aapiee. «Nnojo mmoluin jia. Asoʼiraaitpa naaʼin Jesuu. Jüma namüin na nikirajüinkana Jesuu noʼunaiwa Galileamüin neʼraiwa nia chaʼayaa», nümakalaka namüin.

Suwataamaataka María Magdalena sünain achajawaa nüchiki Pedro nümaa Juan. «Alüʼüjünüshi müliashii», sümaka namüin. Nawataamaataka sünain anaʼlawaa sümüin tü woowirakat. Neʼrapa sünain malujunain napüla, aleʼejaashii naya nachikuaʼa nepialuʼumüin.

Aleʼejüsü María süchikuaʼa eemüin tü woowirakat. Shiʼraka piamashii aapiee. «Nnojotsü tatüjaain saaʼu jalakuwalin nülüʼüjünüin müliashii», sümaka namüin. Shiʼraka mamüin aka tüsa wanee wayuu, niayaa saaʼinruʼu wanee wayuu apünajüi. Süsakiraka nia: «¿Pütüjaa aaʼuchi jalakuwalin alüʼüjünüin müliashii?». Wanaa sümaa «María» nümüin chi wayuukai sümüin, shiyaawata aaʼuchi niain Jesuu. «Ekirajüikalee», sümaka nümüin, shiʼyalajaka sümaa suwaʼülaain nunuloʼupünaa. «Püma namüin na tawalayuukana sünain piʼrüitchipain taya», nümaka Jesuu sümüin. Suwataamaataka María süpüla süküjain namüin na nikirajüinkana Jesuu sünain shiʼrüitchipain nia.

Shiasaʼa joo mapa, eeshii piamashii nikirajüin Jesuu ojuʼitushii naya Jerusalénjee, chaʼwalii naya Emaús. Nürütkaaka wanee wayuu nanainmüin sümaa waraitüin nia namaa. Nüsakiraka chi wayuukai kasain naashajaain achiki. «Atak, ¿nnojotyülia pütüjaain saaʼu tü alatakat? Alatüirü apünüin kaʼi süchikijee nuʼutinnüin aaʼin Jesuu natuma na laülaashiikana napüleerua na sacerdootekana. Shiasaʼa joo, eesü waneirua jieyuu eʼraka nia sünain süsoʼiraaitpain naaʼin», namaka nümüin. «¿Nnojotsüsaʼa junoujain sünain tü namakat na nünüikimaajanakana Maleiwa? Mataasü namaka ouktajachin chi Mesíaskai sümaa süsoʼiraainjatüin  naaʼin», nümaka chi wayuukai namüin. Ayatüshi chi wayuukai nüküjain namüin tü pütchi ekeraajakat suluʼu tü Ashajuushikat nüchiki chi Mesíaskai. Shiasaʼa nantapa Emaús, «anashi wamaale pia» müshii na nikirajüinkana Jesuu nümüin chi wayuukai. Süpülapünaa nekaain pan, nuchuntaka chi wayuukai nümüin Maleiwa, nayaawataka aaʼu niain Jesuu chi wayuukai. Yüüʼülaa nümaka noulia.

Noʼunamaataka joo na nikirajüinkana Jesuu Jerusalénmüin. Nantaka suluʼumüin wanee piichi eejanale jutkatüin napüla na aluwataaushiikana otta naküjaka namüin tü alatakat namüin. Sümaʼinruʼu yalajanain naya jutkatüin, eeʼiyataashi Jesuu namüin. Nnojotsü nanoujain anain paala sünain niain Jesuu chi neʼrakai. «Jiirakaa sümüin sülioʼu tajapü, jipetta taya. Ashajünüsü paala sünain süsoʼiraainjatüin naaʼin chi Kürisütokai saʼakajee tü ouktüsükalüirua», nümaka Jesuu namüin.