To okú Jesu tọn godo, dawe adọkunnọ de he nọ yin Josẹfu biọgbè Pilati nado de oṣiọ Jesu tọn jẹte sọn pòtin lọ ji. Josẹfu yí alavọ dagbedagbe do blá oṣiọ lọ po nuwhẹ́nkun lẹ po bo tẹ́ ẹ do yọdò yọyọ de mẹ. E sọ bli zannu daho de do nùvo yọdò lọ tọn nù. Yẹwhenọgán lẹ dọna Pilati dọ: ‘Mí to budi dọ devi Jesu tọn delẹ na yì ze oṣiọ etọn sẹ̀ bo na dọ dọ ewọ ko gọwá ogbẹ̀.’ Enẹwutu, Pilati dọna yé dọmọ: ‘Mì yí hiadonu do tlẹ́ yọdò lọ bo ṣọ́ ẹ.’

To azán atọ̀n godo, yèdọ to afọnnu fuu, yọnnu delẹ yì yọdò lọ kọ̀n bo mọdọ zannu lọ ko yin bibli sẹ̀. To whenue yé biọ yọdò lọ mẹ, angẹli de dọna yé dọmọ: ‘Mì dibu blo. Jesu ko yin finfọnsọnku. Mì yì bo dọna devi etọn lẹ dọ yé ni yì pé e to Galili.’

Malia Magdaleni họ̀nwezun yì mọ Pita po Johanu po bo dọna yé dọ: ‘Mẹde ko ze oṣiọ Jesu tọn sẹ̀!’ Pita po Johanu po lọsu họ̀nwezun yì yọdò lọ kọ̀n. Whenue yé mọdọ e ko jẹvọ́, yé lẹkọyi whé.

Malia lẹkọwa yọdò lọ kọ̀n bo mọdọ angẹli awe to e mẹ, e sọ dọna yé dọmọ: ‘N’ma yọ́n fihe yé ze Oklunọ ṣie yì.’ Enẹgodo, e mọ dawe de, bo lẹndọ jipa-họ́tọ lọ wẹ, enẹwutu e dọna ẹn dọ: ‘Mẹdaho, jaale bo dọ fie hiẹ ze e yì na mi.’ Ṣigba, tlolo he dawe lọ dọ, “Malia!” yọnnu lọ doayi e go dọ Jesu wẹ. E sọ dawhá dọ, “Mẹplọntọ!” bo tẹdo e go. Jesu dọna ẹn dọ: ‘Yì dọna mẹmẹsunnu ṣie lẹ dọ hiẹ ko mọ mi.’ To afọdopolọji, Malia họ̀nwezun yì devi lẹ dè bo dọna yé dọ emi ko mọ Jesu.

To nukọn mẹ to gbenẹgbe, devi awe to zọnlinzin sọn Jelusalẹm jei Emausi. Dawe de dọnsẹpọ yé to aliho lọ ji bo kàn nuhe ji yé to hodọdo sè yé. Yé sọ dọmọ: ‘A ma sè nuhe jọ wẹ ya? To azán atọ̀n die, yẹwhenọgán lẹ hù Jesu. Podọ todin, yọnnu delẹ to didọ dọ e togbẹ̀!’ Dawe lọ sọ kanse yé dọmọ: ‘Mì ma yí yẹwhegán lẹ sè wẹ ya? Yé ka dọ dọ Klisti lọ na kú bo na yin finfọnsọnku maa.’ E zindonukọn nado to zẹẹmẹ  basina yé do Owe-wiwe lẹ ji. Whenue yé jẹ Emausi, devi lẹ dọna dawe lọ dọ ni hodo yé. To whenue yé ja núdùdù whèjai tọn dù gbé bọ e hodẹ̀ do akla ji, yé wá yọnẹn dọ Jesu wẹ. To whenẹnu, e bu sọn ṣẹnṣẹn yetọn.

Devi awe lọ lẹ họ̀nwezun yì Jelusalẹm, to owhé he gbè apọsteli lẹ pli do bo dọ nuhe jọ lọ na yé. Dile yé to ohọ̀ lọ mẹ, Jesu sọawuhia yemẹpo. To tintan whenu, e vẹawuna apọsteli lẹ nado yise dọ Jesu wẹ. Ewọ sọ dọna yé dọmọ: ‘Mì pọ́n alọ ṣie lẹ; mì doalọ go e. E ko yin kinkan dọ Klisti na fọ́n sọn oṣiọ lẹ mẹ.’