Jesu akua, nĩ harĩ mũndũ ũmwe warĩ mũtongu wetagwo Jusufu wathiire kũũria Pilato amwĩtĩkĩrie oe mwĩrĩ wake. Jusufu aahakire mwĩrĩ ũcio indo cia kũnunga wega, akĩwoha na gĩtambaya kĩega, agĩcoka akĩũkomia mbĩrĩra-inĩ njerũ. Aacokire akĩgaragaria ihiga inene na akĩhinga mbĩrĩra ĩyo. Athĩnjĩri-Ngai arĩa anene meerire Pilato ũũ: ‘Nĩ tũretigĩra arutwo amwe a Jesu matigathiĩ moe mwĩrĩ ũcio macoke moige atĩ nĩ ariũkĩte.’ Nĩ ũndũ ũcio Pilato akĩmeera ũũ: ‘Hingai mbĩrĩra ĩyo biũ na mũmĩrangĩre.’

Thutha wa thikũ ithatũ, atumia amwe nĩ maathiire mbĩrĩra-inĩ ĩyo rũcinĩ tene na magĩkora ihiga rĩu rĩgaragarĩtio rĩkeherio. Mũraika ũmwe warĩ thĩinĩ wa mbĩrĩra ĩyo aamerire ũũ: ‘Tigai kũmaka. Jesu nĩ ariũkĩtio. Thiĩi mwĩre arutwo ake mathiĩ Galili nĩ mekũmũkora kuo.’

Mariamu Mũmagidali nĩ aateng’erire nĩguo agacarie Petero na Johana. Aamerire ũũ: ‘Kũrĩ mũndũ woete mwĩrĩ wa Jesu!’ Petero na Johana nĩ maateng’erire mbĩrĩra-inĩ. Rĩrĩa maakorire ĩtarĩ kĩndũ, no kũinũka maainũkire.

Rĩrĩa Mariamu aacokire mbĩrĩra-inĩ, nĩ onire araika erĩ thĩinĩ na akĩmeera ũũ: ‘Ndiũĩ kũrĩa matwarĩte Mwathani wakwa.’ Aacokire akĩona mũthuri ũrĩa eeciragia atĩ nĩwe mũrĩmi wa mũgũnda ũcio, na akĩmwĩra ũũ: ‘Mũthuri ũyũ, ndagũthaitha ũnjĩre kũrĩa ũmũtwarĩte.’ No rĩrĩa mũthuri ũcio eetanire “Mariamu!” nĩ aamenyire atĩ aarĩ Jesu. Mariamu oigire o rĩmwe “Mũrutani!” na akĩmũnyita. Jesu aamwĩrire ũũ: ‘Thiĩ wĩre ariũ a Awa atĩ nĩ wanyona.’ Mariamu aateng’erire kũrĩ arutwo o hĩndĩ ĩyo na akĩmeera atĩ nĩ onete Jesu.

Mũthenya o ũcio nĩ kũrĩ arutwo erĩ moimaga Jerusalemu magĩthiĩ Emau. Marĩ njĩra-inĩ, mũthuri ũmwe nĩ aamakinyĩrire na akĩmoria maaragia ũhoro wĩgiĩ kĩĩ. Maamwĩrire ũũ: ‘Kaĩ ũtaiguĩte? Athĩnjĩri-Ngai arĩa anene nĩ maroragire Jesu thikũ ithatũ thiru. Na rĩu kũrĩ na atumia amwe maroiga atĩ nĩ ariũkĩte!’ Nake mũthuri ũcio akĩmoria: ‘Kaĩ mũtetĩkĩtie anabii? Moigire atĩ Kristo nĩ  angĩakuire acoke ariũkio.’ Nĩ aathiire na mbere kũmataarĩria ũrĩa Maandĩko moigĩte. Rĩrĩa maakinyire Emau, arutwo nĩ maamwĩrire athiĩ hamwe nao kũrĩa maathiaga. Thutha wa mũthuri ũcio kũhoera mũgate hwaĩ-inĩ rĩrĩa marĩanagĩra, nĩ maamenyire atĩ aarĩ Jesu. Aacokire akĩbuĩria.

Arutwo acio nĩ maahiũhire magĩthiĩ nginya Jerusalemu nyũmba-inĩ ĩrĩa atũmwo macemanĩtie, na makĩmeera ũrĩa kwahanĩkĩte. Rĩrĩa maarĩ nyũmba-inĩ ĩyo, Jesu nĩ aamoimĩrĩire othe. Kĩambĩrĩria-inĩ atũmwo matietĩkagia atĩ aarĩ Jesu. Aacokire akĩmeera ũũ: ‘Ta rorai moko makwa; hutiai. Nĩ kwandĩkĩtwo atĩ Kristo nĩ angĩkariũkio kuuma kũrĩ akuũ.’