Eshi Jesus a fya, omulumenhu umwe oshipuna wedina Josef okwa li a pula Pilatus opo a kufe ko oshimhu shaJesus komuti. Josef okwe shi tonyena momalapi oliina noku shi vaeka oinima yedimba liwa ndele te shi tula mombila ipe. Okwa li a idila ko nemanya lidjuu. Ovapristeri ovakulunhu ova li va lombwela Pilatus tava ti: ‘Otwa tila ovahongwa vamwe vaJesus ve uye va vake mo oshimhu shaye ndele tava ti kutya okwa nyumuka.’ Onghee hano, Pilatus okwe va lombwela a ti: ‘Kombila tuleni ko oshihakifo ndele tamu i nangele.’

Konima yomafiku atatu, ovakainhu vamwe ova li va ya kombila ongula inene ndele ova hanga emanya la undulwa ko. Eshi va tala mombila, ova mona mo omweengeli ndele te va lombwele ta ti: ‘Inamu tila. Jesus okwa nyumuka. Indeni mu ka lombwele ovahongwa vaye ve ke mu shakeneke kuGalilea.’

Maria Magdalena okwa ya diva kuPetrus naJohannes ndele te va lombwele ta ti: ‘Ope na omunhu a kufa mo oshimhu shaJesus.’ Petrus naJohannes ova tondokela kombila, naashi va tala mo, inava hanga mo sha ndele tava shuna komaumbo.

Eshi Maria a shuna kombila, okwa mona ovaengeli vavali ve li meni ndele te va lombwele ta ti: ‘Nghi shii kutya ova twala peni Omwene wange.’ Opo nee okwa mona omulumenhu wonhumba, ndele ta diladila kutya omulongi womoshikunino noku mu pula ta ti: ‘Omufimanekwa, alikana lombwele nge kutya openi wa tula Omwene wange.’ Ndele eshi omulumenhu oo e mu ifana a ti ‘Maria!’ okwa dimbuluka kutya oJesus. Okwa ingida ta ti: ‘Muhongi!’ ndele te mu kwata. Jesus okwe mu lombwela a ti: ‘Inda u ka lombwele ovamwatate kutya owa mona nge.’ Diva Maria okwa ya kovahongwa ndele te va lombwele kutya okwa mona Jesus.

Konima yefimbo, ovahongwa vavali ova li mondjila tava di kuJerusalem va finda kuEmaus. Ova li va hangwa komulumenhu umwe mondjila ndele te va pula kutya otava popi kombinga yashike. Ova ti: ‘Ku na eshi wa uda? Omafiku atatu a pita, ovapristeri ovakulunhu ova dipaa Jesus. Ashike ovakainhu vamwe ove tu lombwela kutya oku na omwenyo.’ Omulumenhu oo okwe va pula a ti: ‘Inamu itavela ovaprofeti? Ova ti kutya Kristus oku na  okufya nokunyumuka.’ Okwa twikila oku va fatululila Omishangwa. Eshi va fika kuEmaus, ovahongwa ova li va pula omulumenhu oo a kale pamwe navo. Fimbo va li tava li ouvalelo konima eshi a ilikana, ova li va dimbuluka kutya oJesus. Opo nee okwa dja po puvo.

Ovahongwa ovo vavali ova li va ya diva kuJerusalem keumbo oko kwa li kwa ongala ovayapostoli ndele tave va lombwele osho sha ningwa po. Fimbo va li oko, ve li meumbo, Jesus okwe va holokela aveshe. Tete kava li va itavela kutya oJesus. Opo nee okwa ti: ‘Taleni eenyala dange ndele tamu kumu nge. Omaxunganeko okwa ti kutya Kristus ota ka nyumuka.’