Kioso kiafu Jezú, sai diiala uexile mvuama, a muixana Zuze, ua bhingi kua Pilatu, phala ku mu ehela kukatula o kimbi kia Jezú ku taka. Zuze ua vungina o kimbi mu dilasola dia linhu ia fina, anga u ki tula mu mbila ia ubhe. O mbila anga a i jika ni ditadi dionene. O akunji a makota a tangela Pilatu: ‘Tuala ni uôma kuila, o maxibulu a Jezú aia mu usuku, hé a nhana o kimbi kiê, n’a ka tangele o mundu, exi: Ua fukunuka ku’alunga.’ Mu kiki, Pilatu ua a tangela: ‘Jike-nu o mbila, mu i lange.’

Mu ku bhita izuua itatu, sai ahatu a tundu mu kamene, phala kuia mu tala o mbila. Kioso kia bhixila, a sange o ditadi dia jikile o mbila, dio katule. Moxi a mbila, o anju ia zuela ni ahatu, uixi: ‘Ki mu kale ni uôma. Jezú ua fukunuka. Ndenu mua ka tangele o maxibulu mê, phala ku mu sanga mu Ngalileia.’

Madiia dia Manda ua lenge, phala ku di sanga ni Phetele ni Nzuá. Muene ua a tangela: ‘Sai muthu uambata o kimbi kia Jezú!’ Phetele ni Nzuá a lengela bhu mbila. Kioso kia mono kuila, mu mbila ki mua kexile kima, ene a vutuka ku mabhata mâ.

Kioso Madiia kia vutuka bhu mbila, muene ua mono anju jiiadi moxi dia mbila, anga ua tangela: ‘Ki ngejiia kuebhi kuambata o kimbi kia Ngana iami.’ Mu kusuluka, muene ua mono diiala. Maji kuma Madiia ua kexile mu banza kuila, o diiala dia kexile mu langa o jimbila, muene ua mu tangela: ‘Ngana, ngi tangele o kididi bhua muambata.’ Maji kioso o diiala dia muixana: “Madiia!” Muene uejiidile kuila, Jezú. Muene ua di kola: ‘Mesene!’ Anga u mu naminina. Jezú ua mu tangela: ‘Ndenu ka tangedienu phange jami kuila, mua ngi mono.’ Madiia uai ni lusolo phala kutangela o maxibulu kuila, ua mono Jezú.

Mu kizuua kieniókio, maxibulu aiiadi akexile mu tunda mu Jeluzaleme, phala kuia ku Emaú. Mu njila, kua moneka diiala, anga di kala mu kuenda nau kumoxi, ni kua ebhuidisa se a mu di kunda maka ahi. Ene a tambuijila, exi: ‘Kuijiia o ima ia mu bhita? O akunji a makota a jibha Jezú. Tundé kia mu jibha, kua bhiti kiá izuua itatu.  Maji sai ahatu a zuela kuila, muene uala ku muenhu!’ O diiala dia ebhuidisa, uixi: ‘Enu mua kokoloka muxima mu kuxikana ima ioso ia zuela o jipolofeta? Ene a zuela kuila, Kristu ueji fua, mu kusuluka, eji mu fukununa.’ Muene ua suluka ni kua jimbuluila o Mikanda Ikola. Kioso kia bhixila ku Emaú, o maxibulu a mu bhingi phala kukala nau. Mu ola ia kudia, kioso kia zubha o kusamba phala kusakidila o mbolo, ene a mono kuila, Jezú. Mu kusuluka, muene ua jiminina.

O maxibulu aiiadi, a lengela mu Jeluzaleme, mua diongekele o jipoxolo, anga a a tangela o ima ia bhitile. Kioso ene oso exile mu inzo, Jezú ua a tukulukila. Ku dimatekenu, o jipoxolo ka kexile mu xikina kuila, Jezú. Mu kusuluka, muene uambe: ‘Talenu maku mami, ngi kuatienu. Kio soneke kuila, Kristu ueji fua, ni ku mu fukununa.’