Afta Jizɔs day, wan jɛntriman we nem Josɛf bin aks Paylet fɔ mek i pul Jizɔs in bɔdi pan di stik we dɛn nel am pan. Josɛf rap di bɔdi wit fayn linin klos ɛn spays dɛn ɛn bɛr am na wan nyu grev we dɛn mek insay rɔk. I mek dɛn put wan ɛvi ston na di domɔt. Di bigman dɛn fɔ di prist dɛn tɛl Paylet se: ‘Wi de fred se sɔm pan Jizɔs in disaypul dɛn go kam tek in bɔdi ɛn tɔk se Jizɔs dɔn gɛt layf bak.’ So Paylet tɛl dɛn se: ‘Una lɔk di grev ɛn gayd am.’

Afta tri dez, sɔm uman dɛn go na di grev ali mɔnin, ɛn dɛn mit di ston dɔn kɔmɔt na di grev in domɔt. Insay di grev, wan enjɛl tɛl di uman dɛn se: ‘Una nɔ fred. Jizɔs dɔn gɛt layf bak. Una go tɛl in disaypul dɛn fɔ mit am na Galili.’

Meri Magdalin rɔn go fɛn Pita ɛn Jɔn. I tɛl dɛn se: ‘Pɔsin dɔn tek Jizɔs in bɔdi!’ Pita ɛn Jɔn rɔn go na di grev. We dɛn si se di grev ɛmti, dɛn go bak na dɛn os.

We Meri go bak na di grev, i si tu enjɛl dɛn insay de, ɛn i tɛl dɛn se: ‘A nɔ no udat dɔn tek mi Masta.’ Dɔn Meri si wan man, ɛn i tink se na di man we de wok na di gadin. So Meri tɛl di man se: ‘Duya tɛl mi usay yu dɔn kɛr Jizɔs.’ Bɔt we di man se, “Meri!” Meri kam fɔ no se na Jizɔs. Meri ala lawd wan se: “Ticha!” ɛn i ɔg Jizɔs. Jizɔs tɛl am se: ‘Go tɛl mi brɔda dɛn se yu dɔn si mi.’ Wantɛm wantɛm, Meri rɔn go tɛl di disaypul dɛn se i si Jizɔs.

Leta da de de, tu disaypul dɛn bin de waka kɔmɔt na Jerusɛlɛm fɔ go na Ɛmeɔs. Wan man bigin fɔ waka wit dɛn, ɛn i aks dɛn wetin dɛn de tɔk bɔt. Dɛn tɔk se: ‘Yu nɔ yɛri yet? Di bigman dɛn fɔ di prist dɛn kil Jizɔs insay dis tri dez we dɔn pas. Naw sɔm uman dɛn se i de alayv!’ Di man aks dɛn se: ‘Una nɔ biliv di prɔfɛt dɛn? Dɛn tɔk se Krays go day, ɛn i go gɛt layf bak.’ Di man kɔntinyu fɔ ɛksplen di Skripchɔ dɛn to dɛn. We di  tu disaypul dɛn rich na Ɛmeɔs, dɛn tɛl di man fɔ go wit dɛn. Afta we di man pre pan di bred we dɛn de it ivintɛm, di disaypul dɛn kam fɔ no se na Jizɔs. Dɔn Jizɔs lɔs.

Di tu disaypul dɛn rɔn go na di os na Jerusɛlɛm usay di apɔsul dɛn bin gɛda, ɛn dɛn tɛl dɛn wetin dɔn apin. We dɛn bin de insay di os, Jizɔs apia to dɛn ɔl. Fɔs, di apɔsul dɛn nɔ bin biliv se na Jizɔs. So Jizɔs tɛl dɛn se: ‘Una luk mi an dɛn ɛn tɔch mi. Dɛn bin rayt se di Krays go gɛt layf bak.’