တၢ်မၤလိ ၉၁
ယ့ၣ်ၡူးဂဲၤဆၢထၢၣ်သမူထီၣ်က့ၤ
ဖဲယ့ၣ်ၡူးသံဝံၤအလီၢ်ခံ ပှၤကဲဒိၣ်အိၣ်ဝဲတဂၤလၢအမံၤမ့ၢ် စီၤယိၤသးန့ၣ် အဝဲလဲၤဃ့အခွဲးလၢ စီၤပံၤလးအအိၣ်ဒ်သိး အကဟံးန့ၢ်ယ့ၣ်ၡူးအစိၣ်လၢ သ့ၣ်တၢၣ်အလိၤန့ၣ်လီၤ. ဝံၤဒီးစီၤယိၤသးဘိၣ်ဘံထီၣ် ယ့ၣ်ၡူးအစိၣ်လၢ တၢ်ကံးညာ်ဖှီဝါကဆှၣ် ဒီးတၢ်နၢမူလီၤ. ဒီးအဝဲလဲၤပာ်လီၤဝဲအစိၣ်လၢ တၢ်သွၣ်ခိၣ်အသီအပူၤလီၤ. အဝဲတလ့ၣ်ဃီၤလၢၢ်ဖးဒိၣ်တဖျၢၣ် ဒ်သိးကကးဘၢဃာ်ဝဲ တၢ်သွၣ်ခိၣ်အခိၣ်ထိးအဂီၢ်လီၤ. ပှၤလုၢ်တၢ်အဒိၣ်တဖၣ်တဲဘၣ် စီၤပံၤလးလၢ– ‘ပပျံၤလၢ ယ့ၣ်ၡူးအပျဲၢ်အဘီၣ်တနီၤ ကဟဲဟံးန့ၢ်အစိၣ်ဒီး တဲဝဲလၢယ့ၣ်ၡူးဂဲၤဆၢထၢၣ်သမူထီၣ်က့ၤလံ.’ အဃိ စီၤပံၤလးတဲဘၣ်အဝဲသ့ၣ်လၢ– ‘ကးတံၢ်ဃာ်တၢ်သွၣ်ခိၣ်လၢလၢၢ် ဒီးခိးကွၢ်တၢ်သွၣ်ခိၣ်န့ၣ်တက့ၢ်.’
သၢသီဝံၤအလီၢ်ခံ ဖဲဂီၤခီဂီၤဂီၤ ပိာ်မုၣ်တနီၤလဲၤဝဲလၢ တၢ်သွၣ်ခိၣ်ဒီးထံၣ်ဝဲလၢ တၢ်သွၣ်ခိၣ်အခိၣ်ထိးန့ၣ် ပှၤတလ့ၣ်ကွံာ်လၢၢ်လံ. လၢတၢ်သွၣ်ခိၣ်အပူၤန့ၣ် မူခိၣ်ကလူးတဂၤ တဲဘၣ်အဝဲသ့ၣ်လၢ– ‘ပျံၤတၢ်တဂ့ၤ, ယ့ၣ်ၡူးဂဲၤဆၢထၢၣ်သမူထီၣ်က့ၤလံ. က့ၤတဲဘၣ်အပျဲၢ်အဘီၣ်တဖၣ်လၢ အဝဲသ့ၣ်ကဘၣ် လဲၤထံၣ်လိာ်အသးဒီးယ့ၣ်ၡူးလၢ ကၤလံၤလါန့ၣ်တက့ၢ်.’
နီၢ်မၤရံမၤကဒၤလ့ၣ် ကရီလဲၤဝဲဆူစီၤပ့းတရူးဒီး စီၤယိၤဟၣ်အအိၣ်လီၤ. နီၢ်မၤရံတဲဘၣ်အဝဲသ့ၣ်လၢ– ‘ပှၤတဂၤဟဲဟံးန့ၢ်ယ့ၣ်ၡူးအစိၣ်လံ.’ အဃိ စီၤပ့းတရူးဒီးစီၤယိၤဟၣ်လဲၤဃ့ၢ်ဝဲဆူ တၢ်သွၣ်ခိၣ်လီၤ. ဖဲအဝဲသ့ၣ် လဲၤတုၤဝဲအခါ တထံၣ်ယ့ၣ်ၡူးအစိၣ်လၢ တၢ်သွၣ်ခိၣ်အပူၤလၢၤဘၣ်, အဃိ အဝဲသ့ၣ်က့ၤဝဲဆူအဟံၣ်လီၤ.
ဖဲနီၢ်မၤရံက့ၤကဒါက့ၤဆူ တၢ်သွၣ်ခိၣ်အခါ ထံၣ်ဝဲမူခိၣ်ကလူးခံဂၤ အိၣ်လၢတၢ်သွၣ်ခိၣ်အပူၤလီၤ. နီၢ်မၤရံတဲဘၣ်အဝဲသ့ၣ်လၢ– ‘ပှၤလဲၤပာ်ယကစၢ်အစိၣ်ဖဲလဲၣ်န့ၣ်, ယတသ့ၣ်ညါဘၣ်.’ ဝံၤဒီးနီၢ်မၤရံထံၣ်ဝဲပိာ်ခွါတဂၤ ဒီးဆိကမိၣ်ဝဲလၢ အမ့ၢ်ပှၤပၢၤတၤသၣ်အလီၢ်အဃိ တဲဘၣ်အီၤလၢ– ‘နလဲၤပာ်ယကစၢ်အစိၣ်ဖဲလဲၣ်, ဝံသးစူၤတဲဘၣ်ယၤမီၤ.’ ဘၣ်ဆၣ် ဖဲပိာ်ခွါတဂၤအံၤတဲဝဲလၢ ‘နီၢ်မၤရံဧၢ’ အခါ နီၢ်မၤရံသ့ၣ်ညါဝဲလၢ အဝဲမ့ၢ်ယ့ၣ်ၡူးလီၤ. နီၢ်မၤရံကိးပသူထီၣ်လၢ– ‘ကစၢ်ဧၢ’ ဒီးဖီၣ်ဃာ်အီၤလီၤ. ဒီးယ့ၣ်ၡူးတဲဘၣ်အီၤလၢ– ‘က့ၤတဲဘၣ် ယဒီပုၢ်ဝဲၢ်တဖၣ်လၢ နထံၣ်ဘၣ်ယၤတက့ၢ်.’ တဘျီဃီန့ၣ် နီၢ်မၤရံက့ၤဃ့ၢ်ဝဲဆူ ယ့ၣ်ၡူးအပျဲၢ်အဘီၣ်တဖၣ်အအိၣ် ဒီးတဲဘၣ်အဝဲသ့ၣ်လၢ အထံၣ်ဘၣ်ယ့ၣ်ၡူးန့ၣ်လီၤ.
လၢခံဖဲနံၤအဝဲန့ၣ် ယ့ၣ်ၡူးအပျဲၢ်အဘီၣ်ခံဂၤ အိၣ်လၢယရူၤၡလ့ၣ်ဒီးလဲၤဝဲဆူ အ့းမၤအူလီၤ. ဖဲအဝဲသ့ၣ်လဲၤတၢ်လၢကျဲအခါ ပိာ်ခွါတဂၤဟဲပိာ်ထီၣ်အဝဲသ့ၣ်အခံ ဒီးသံကွၢ်ဝဲလၢ သုတဲသကိးတၢ်ဂ့ၢ် မနုၤလဲၣ်. အဝဲသ့ၣ်တဲဘၣ် ပိာ်ခွါအံၤလၢ– ‘ဖဲအပူၤကွံာ်သၢသီန့ၣ် ပှၤလုၢ်တၢ်အဒိၣ်တဖၣ် မၤသံယ့ၣ်ၡူးန့ၣ်, နတနၢ်ဟူဧီၤ. ဘၣ်ဆၣ်ခဲအံၤ ပိာ်မုၣ်တနီၤတဲဝဲလၢ ယ့ၣ်ၡူးဂဲၤဆၢထၢၣ်သမူထီၣ်က့ၤလံ.’ ပိာ်ခွါန့ၣ်သံကွၢ်က့ၤ အဝဲသ့ၣ်လၢ– ‘ဝံအတၢ်စံးပာ်လၢ အတဲဝဲလၢ ခရံာ်ကဘၣ်တၢ်မၤသံအီၤ ဒီးကဂဲၤဆၢထၢၣ်သမူထီၣ်က့ၤန့ၣ် သုတနာ်ဘၣ်ဧါ.’ ဝံၤဒီးပိာ်ခွါတဂၤအံၤ ဆဲးတဲနၢ်ပၢၢ်အဝဲသ့ၣ်လၢ လံာ်စီဆှံအဆၢတဖၣ်လီၤ. ဖဲအဝဲသ့ၣ်လဲၤတုၤလၢ အ့းမၤအူအခါ အဝဲသ့ၣ်မၢပိာ်ခွါတဂၤအံၤ လဲၤတၢ်ဒီးအဝဲသ့ၣ်န့ၣ်လီၤ. ဒီးဖဲအဝဲသ့ၣ်ကအီၣ် ဟါခီတၢ်အီၣ်အခါ ပိာ်ခွါအံၤဃ့ဘါထုကဖၣ်တၢ်ဝံၤဒီး အဝဲသ့ၣ်သ့ၣ်ညါဝဲလၢ ပိာ်ခွါအံၤမ့ၢ်ဝဲယ့ၣ်ၡူးလီၤ. ဝံၤဒီးယ့ၣ်ၡူးလီၤမၢ်ဝဲလီၤ.
ဝံၤဒီးယ့ၣ်ၡူးအပျဲၢ်အဘီၣ်ခံဂၤအံၤ ကရီက့ၤကဒါက့ၤဆူ ဝ့ၢ်ယရူၤၡလ့ၣ်အပူၤ ဖဲတၢ်မၢဖိတဖၣ်အိၣ်ဝဲအလီၢ် ဒီးအဝဲသ့ၣ်တဲဘၣ် တၢ်မၢဖိတဖၣ်လၢ တၢ်မၤအသးတဖၣ်အံၤအဂ့ၢ်လီၤ. ဖဲအဝဲသ့ၣ်အိၣ်လၢ ဟံၣ်ပူၤအဆၢကတီၢ် ယ့ၣ်ၡူးလီၣ်ဖျါထီၣ်အသးလၢ အဝဲသ့ၣ်ခဲလၢာ်အမဲာ်ညါလီၤ. အဆိကတၢၢ်န့ၣ် တၢ်မၢဖိတဖၣ်တနာ်ဝဲလၢ အဝဲမ့ၢ်ယ့ၣ်ၡူးဘၣ်. ဝံၤဒီးယ့ၣ်ၡူးတဲဝဲလၢ– ‘ကွၢ်ယစု, ဖီၣ်ကွၢ်ယၤတက့ၢ်. တၢ်ကွဲးအသးစံးဝဲလၢ ခရံာ်သံဝံၤအလီၢ်ခံ ကဂဲၤဆၢထၢၣ်သမူထီၣ်က့ၤလီၤ.’
“ယဲဒၣ်အံၤယမ့ၢ်ကျဲ, ဒီးတၢ်မ့ၢ်တၢ်တီ, ဒီးတၢ်မူလီၤ. မ့တမ့ၢ်ဘၣ်ယၤဒီး, ပှၤတဟဲဘၣ်ဆူ ပၢ်အအိၣ်နီတဂၤဘၣ်.”—ယိၤဟၣ် ၁၄:၆
တၢ်ဂ့ၤအဂၤလၢ နကဘၣ်သး
လံာ်စီဆှံအံၤ အတၢ်ကစီၣ် မ့ၢ်မနုၤလဲၣ်
ယ့ၣ်ၡူးမူထီၣ်က့ၤလံ
ကစၢ်ယွၤဒုးဂဲၤဆၢထၢၣ်သမူထီၣ်က့ၤ ယ့ၣ်ၡူးန့ၣ်အပျဲၢ်အဘီၣ်တဖၣ် သ့ၣ်ညါထီၣ်ဝဲလၢကျဲဒ်လဲၣ်.
