Jesu hasaashwile, muuna wa mufumi yabizwa Josefa akupa Pilato kuli azwise situpu sa Jesu fa kota. Josefa atata situpu seo mwa lisila lelinde la line ni kusibeya minunko yeminde mi asibeya mwa libita lelinca. Naabeile licwe leli bukiti fa munyako wa libita. Baprisita babahulu babulelela Pilato kuli: ‘Luikalelwa kuli babañwi babalutiwa ba Jesu bakashimba situpu sahae ni kubulela kuli uzuhile kwa bafu.’ Kacwalo, Pilato ali ku bona: ‘Hamukwale libita mi mulikantele.’

Hamulaho wa mazazi amalaalu, ka nako ya kakusasana, basali babañwi baya kwa libita mi bafumana kuli licwe nelizwisizwe kwateñi. Mwahali mone kuinzi situpu, lingeloi labulelela basali kuli: ‘Musike mwasaba. Jesu uzusizwe kwa bafu. Hamuye muyo bulelela balutiwa bahae kuli bakayo mufumana mwa Galilea.’

Maria Magdalena amata kuli ayo bata Pitrosi ni Joani. Hasaa bafumani, ababulelela kuli: ‘Mutu yomuñwi ushimbile situpu sa Jesu!’ Pitrosi ni Joani bamatela kwa libita. Hane baboni kuli mwa libita kuinzi mukungulu bakutela kwa mandu abona.

Maria hanaakutezi kwa libita, abona mangeloi amabeli mwahali, mi ali ku ona: ‘Hanizibi kobaisize Mulenaaka.’ Cwale abona muuna, ka kuhupula kuli neli mulimi, kihaa li: ‘Muñaaka, haku nitaluseze kou mubeile.’ Kono muuna yo hanaabulezi kuli, “Maria!” aziba kuli neli Jesu. Ahuwa ka linzwi lelituna, ali: “Muluti!” mi amukumbata. Jesu kihaa li ku yena: ‘Zamaya uyo taluseza banyani baka kuli uniboni.’ Honafo feela, Maria amatela kwa balutiwa mi ayo bataluseza kuli uboni Jesu.

Hamulaho wa fo, balutiwa bababeli nebazamaya kuzwa kwa Jerusalema kuliba kwa Emausi. Muuna yomuñwi akala kuzamaya ni bona mwa nzila mi ababuza zene basweli kuambola. Kihaa bali ku yena: ‘Hausika utwa zeezahezi? Mazazi amalaalu kwamulaho, baprisita babahulu nebabulaile Jesu. Kono basali babañwi babulela kuli wapila!’ Muuna yo ababuza kuli: ‘Kana hamulumeli bapolofita? Nebabulezi kuli  Kreste naakashwa ni kuzusiwa kwa bafu hasamulaho.’ Azwelapili kubataluseza Mañolo. Hane bafitile kwa Emausi, balutiwa bakupa muuna yo kuli aye ni bona. Ka nako ya mulalelo, hasaa lapelezi sinkwa, balemuha kuli muuna yo neli Jesu. Kono nebasika bona kwanaakutile.

Balutiwa bababeli bao bamatela kwa Jerusalema mwa ndu mone kuinzi baapositola mi babataluseza zeneezahezi. Hane bali mwa ndu yeo, Jesu aiponahaza ku bona kaufela. Sapili, baapositola nebasika lumela kuli neli Jesu. Cwale ali ku bona: ‘Hamubone mazoho aka; hamuswale mwa mazoho aka. Nekuñozwi kuli Kreste naaka zusiwa kwa bafu.’