Pāfwile Yesu, mpeta umo witwa bu Yosefa wālombele Pilato amupe lupusa lwa kutūkija umbidi wa Yesu ku mutyi. Yosefa wāvungila umbidi’wa mu bukonge bunekena, wāela’mo ne binunka mwenye, wākeulādika mu kibundu kipya. Wāshita’ko kidibwe kilēma. Babitobo bakulu bālombola Pilato amba: ‘Tukwetwe moyo, bana ba bwanga ba Yesu babwanya kwiya kusela umbidi wandi, kupwa banene amba wasanguka.’ Penepo Pilato wēbalombola’mba: ‘Kashitei bininge ku kibundu, mutūle’ko balami.’

Pa kupwa kwa mafuku asatu, lubanga na futwi, bana-bakaji bamo bāenda ku kibundu, bātana’ko pululu kwampikwa dibwe. Mwikeulu umo wādi mu kibundu wāsapwila bana-bakaji’ba amba: ‘Kemwakikwatwai moyo. Yesu ke musanguke. Endai mukasapwile bandi bana ba bwanga’mba bende baketane nandi mu Ngadilea.’

Madia mwine Makadala wāenda lubilo kudi ba Petelo ne Yoano. Wēbasapwila’mba: ‘Kudi wasela umbidi wa Yesu!’ Ba Petelo ne Yoano bāenda lubilo ku kibundu. Abo pa kutana mu kibundu mutupu muntu, bājokela kwabo.

Madia pa kujokela ku kibundu, wāmona bamwikeulu babidi mu kibundu, kāebanena’mba: ‘Nkimwenepo kobaselela Mfumwami.’ Kupwa, Madia wāmona muntu umo, wālanga’mba i kidimye, wāmunena’mba: ‘Mfumwami, nombole kowamutūla.’ Ino muntu’wa pa kumwita’mba, “Madia!” wājingulula’mba i Yesu. Wāmwita na diwi dikatampe amba: “Mufundiji!” wāmushipila. Yesu wāmulombola’mba: ‘Enda ukasapwile banabetu amba ubaumone.’ Ponka na ponka, Madia wāenda lubilo kudi bana ba bwanga, wēbasapwila’mba namone Yesu.

Kitatyi pa kupita’po, nka mu dine difuku’dya, bana ba bwanga babidi bādi batamba ku Yelusalema benda ku Emese. Muntu umo wēbalumba mu dishinda kāebepangula byobesamba. Bāmulombola’mba: ‘Le abe kuyukilepo? Babitobo bakulu baipaile Yesu pano kepadi mafuku asatu. Pano bana-bakaji bamo banena’mba i mūmi!’ Muntu’wa wēbepangula’mba: ‘Banwe kemukulupilepo bapolofeto? Bapolofeto  bālaile’mba Kidishitu ukafwa kadi ukasanguka.’ Muntu’wa wāendelela na kwibashintulwila Bisonekwa. Bano bana ba bwanga pa kufika ku Emese, bāita muntu’wa ende nabo kwabo. Aye pa kupwa kulombela mukate ku byakudya bya kyolwa, bājingulula’mba i Yesu. Ponkapo wēbajimina.

Bano bana ba bwanga babidi bāenda bukidi ku njibo kwādi kwibungile batumibwa mu Yelusalema, kēbebalombola byonso byalongeka. Abo bakidi mwinjibo’mwa, Yesu wēbamwekela abo bonso pamo. Ku ngalwilo, batumibwa kebādipo betabije amba i Yesu. Penepo Yesu wēbalombola’mba: ‘Ntalei mu bikasala; ntengei. Kyālembelwe amba Kidishitu ukasangulwa mu bafwe.’