Yezu mumane kufua, muntu mubanji mukuabu diende Jozefe wakalomba Pilato bua amuanyishile bua kutulula mubidi wa Yezu ku mutshi. Jozefe kujingila mubidi au mu tshilamba tshia line mutambe buimpe, kuwelaye bintu bia dipembu dimpe, ne kuwutekaye mu lukita lupialupia. Wakalomba bua bajike mushiku walu ne dibue dinene. Bakuidi banene bakambila Pilato ne: ‘Tudi ne buôwa bua ne: bamue ba ku bayidi ba Yezu kabalu kuangata mubidi wende ne kuamba ne: mmubike ku lufu.’ Nunku Pilato wakabambila ne: ‘Tekayi tshimanyinu ku lukita, nululame.’

Panyima pa matuku asatu, bakaji bakuabu basatu bakaya patshiatshia ku lukita, kusanganabu dibue diumbusha. Muanjelu kampanda uvua munda mua lukita wakabambila ne: ‘Kanutshinyi to. Yezu ukadi mubishibue. Ndayi nuambile bayidi bende bua baye kutuilangana nende mu Galela.’

Mariya wa ku Magadala wakaya lubilu bua kumonangana ne Petelo ne Yone. Kubambilaye ne: ‘Mbumbushe mubidi wa Yezu mu lukita!’ Petelo ne Yone kuyabu pabu lubilu ku lukita. Pakalusanganabu munda mutupu, bakapingana ku mabu.

Pakapingana Mariya ku lukita, wakamona banjelu babidi munda mualu, kubambilaye ne: ‘Tshiena mumanye kudibu baye ne Mukalenge wanyi to.’ Ke yeye kumona muntu mukuabu, kuelaye meji ne: uvua muena mudimu wa mu budimi abu, kumuambilaye ne: ‘Mukalenge, ngambilaku muaba uudi mumuteke.’ Kadi pakamubikila muntu au ne: “Mariya!” wakajingulula ne: uvua Yezu. Kuelaye lubila ne: “Mulongeshi!” kumukuataye. Yezu kumuambila ne: ‘Ndaku wambile bana betu ne: udi mummone.’ Diakamue Mariya wakaya lubilu kudi bayidi, kubambilaye ne: uvua mumone Yezu.

Dilolo, bayidi babidi bavua mu njila bafumina ku Yelushalema baya ku Emause. Muntu mukuabu kudisanga kudibu mu njila, kutuadijaye kubebeja bivuabu benda bayukila. Bobu kumuambila ne: ‘Wewe kuena mumvue tshidi tshienzeke anyi? Bakuidi banene bavua bashipeshe Yezu kukadi matuku asatu. Mpindieu bamue bakaji badi bamba ne: udi ne muoyo!’ Muntu au kubebeja ne: ‘Kanuenaku nuitabuja baprofete anyi? Si bavua bambe ne: Kristo uvua ne bua kufua ne pashishe  kubishibua ku lufu.’ Wakatungunuka ne kubumvuija Mifundu minsantu. Pakafikabu ku Emause, bayidi abu bakamulomba bua ashale nabu. Pakatekabu biakudia wakasambila, kujingululabu ne: uvua Yezu. Pashishe yeye kubajimina.

Bayidi babidi abu bakaya lukasa mu Yelushalema muvua bapostolo badisangishe, kubambilabu tshivua tshibafikile. Patshivuabu kuntu aku, munda mua nzubu, Yezu wakabamuenekela bonso. Kumpala, bapostolo kabavua bitabe ne: muntu au uvua Yezu to. Ke yeye kubambila ne: ‘Tangilayi bianza bianyi; ndengayi. Bavua bafunde ne: Kristo uvua ne bua kubishibua ku lufu.’