Pa cisila ca mfwa yakwe Yesu, mukankala uwi zina lyakuti Jozefu waile kuli Pilato nu ku munena ukuti amuzumilizye akisye umwili wakwe Yesu pa cimuti. Jozefu watozile umwili wakwe Yesu aupaka amafuta anunkile nu kuupomba umu nsalu isuma sana, alino awika umwi lindi lino yatatazile iyazikamo umuntu. Wakunkulwisye iciliwe cikulu icali umupiipi nu kuciika pa mulyango wi lindi. Intunguluzi zyakwe ya simapepo zyanenyile Pilato ati: ‘Tukutiina ukuti asambi yakwe Yesu yamwi yangasenda umwili wakwe nu kulanda ukuti watatuutululwa.’ Fwandi Pilato wayanenyile ati: ‘Mucilike api lindi nupya mwikeko alinzi.’

Lino papisile amanda yatatu ukufuma pano yamuzikiile, anaci yamwi yaile ukwi lindi katondo nupya yazanyile pasi ciliwe. Malaika uwali ukwi lindi wanenyile anaci ati: ‘Mutuvwa intete. Yesu watatuutuluka. Yangini mukanene asambi yakwe ukuti yamamuzana uku Galili.’

Maliya uwa ku Magadala waile zuwa zuwa kuli Petulo na Yoani. Wayanenyile ati: ‘Umwi watasenda umwili wakwe Yesu!’ Petulo na Yoani yasimwile iyaya ukwi lindi. Lino yazanyile ukuti umwi lindi musi icili consi; yaswilile ukumwao.

Lino Maliya waswilile ukwi lindi, wazanyile ya malaika yaili mukasi nupya wayanenyile ati: ‘Ntamanyile kuno iyasenda Umwene wane.’ Lyene waweni umonsi umwi nupya welenginye ukuti umulimi, lyene wamunenyile ati: ‘Musambazi, napaapata neene kuno ututwala Umwene wane.’ Nomba lino umonsi wiyo wamwamile ati, “Maliya!” alino wilwike ukuti a Yesu. Wapunzile ati: “Kasambilizya!” nupya wamulemile. Yesu wamunenyile ati: ‘Yanga ukaneene aina yane ukuti watundola.’ Lilyo kwene sile, Maliya waile zuwa zuwa ku yasambi nu kuyanena ukuti watalola Yesu.

Wanda kwene uwa, asambi yaili yafumanga uku Yelusalemu ala yakuya uku Emausi. Lyene umonsi umwi wayazanyile nu kuyuzya vino yalandangapo. Nayo yamunenyile iyati: ‘Uzye utuvwa ivyacitika? Papita sile manda yatatu kufuma pano ya simapepo  yakomile Yesu. Lyene ituvwa anaci yamwi yakuti iyalola Yesu ali nu umi.’ Umonsi wiyo wayuzizye ati: ‘Uzye mutataila ya kasesema? Yalanzile ukuti Klistu alafwa nu kutuutululwa.’ Nupya watwalilile ukuyalondolwela Malembo. Lino yafisile uku Emausi yamunenyile ukuti atwalilile ukuya pamwi nayo. Lino yalyanga icakulya ca manguzi wapefile, lyene alino ilwike ukuti a Yesu. Nupya lilyo kwene sile watile ukuloleka.

Asambi yayo yaswilile uku Yelusalemu zuwa zuwa kuno atumwa yakongine nu kuyanena ivyacitike. Lino yali uku Yelusalemu mu ng’anda, Yesu walolekile kuli aliyo. Pa kutandika, atumwa yatasininkizye ukuti wali a Yesu. Lyene wayanenyile ati: ‘Lolini makasa yane, ndeminimo. Calemvilwe ukuti Klistu alatuutululwa.’