Ãlikin an kar Jesus mej, juon rũm̦weiie etan Josep ear kajjitõk ippãn Pail̦at ñe emaroñ bõklal̦tak ãnbwinnin Jesus jãn jurõn al̦al̦ eo. Josep ear illik tol̦aj ak mar ko ilo ãnbwinnin Jesus im kũtimi kõn m̦õttan nuknuk ko rem̦m̦an im kõbabuuki ilo juon lõb ekããl. Im ear pineje mejãn lõb eo kõn juon dekã kileplep. Bũrij ro rel̦l̦ap rar ba ñan Pail̦at: ‘Jekkõl ñe jet iaan rũkal̦oor ran̦ an Jesus renaaj bõk ãnbwinnin im ba ke em̦õj an bar mour.’ Kõn men in, Pail̦at ear ba: ‘Kom̦win kapene mejãn lõb en̦ im waje.’

Jilu raan tokãlik, ke ejibboñtata, jet kõrã rar etal ñan lõb eo im lo bwe em̦õj iuunil̦o̦k dekã eo. Ilowaan lõb eo, juon enjel̦ ej jiroñl̦o̦k er im ba: ‘Kom̦win jab mijak. Em̦õj an Jesus jerkakpeje. Etal im ba ñan rũkal̦oor ro an bwe ren itõn iioone ilo Galili.’

Meri Magdalini ear m̦õkaj in pukottok Piter im Jon. Ke ej loe erro, ear ba: ‘Em̦õj aer bõk ãnbwinnin Jesus!’ Piter im Jon rar m̦õkaj im ettõrl̦o̦k ñan lõb eo. Ke rej lo bwe ejjel̦o̦k kobban lõb eo, rar ro̦o̦l ñan m̦õko m̦weer.

Ke Meri ear ro̦o̦l ñan lõb eo, ear lo ruo enjel̦ rej pãd ilowaan im ear ba ñan er: ‘Ijaje ia eo rar bõkl̦o̦ke ãnbwinnin Irooj eo aõ.’ Innem ke ej oktak likl̦o̦k im lo juon em̦m̦aan, ear l̦õmn̦ak bwe e juon rũkallib. Ear ba ñane: ‘Em̦m̦aan en̦, jouj im ba ñan eõ ia eo kwaar bõkl̦o̦k ãnbwin eo.’ Ak ke em̦m̦aan eo ear ba, “Meri!” ear kajju kile bwe Jesus eo. Ear jañ im ba: “Rũkaki!” im ear atbo̦kwõje. Jesus ear ba ñane: ‘Etal im ba ñan ro jatũ ke kwaar loe eõ.’ Ilo iien eo wõt, Meri ear ettõrl̦o̦k ñan ippãn rũkal̦oor ro im ba ñan er ke ear loe Jesus.

Tokãlik ilo ejja raan eo wõt, ruo iaan rũkal̦oor ro rar etetal jãn Jerusalem ñan bukwõn eo etan Emmeõs. Ilo ial̦ eo aerro, juon em̦m̦aan ear etal ippãerro l̦o̦k im kajjitõk ta eo erro ej kõnnaan kake. Erro kar ba: ‘Kwõjjañin roñ ke? Jilu raan emootl̦o̦k, bũrij ro rel̦l̦ap rar m̦an Jesus im ear mej. Ak kiiõ jet kõrã rej ba bwe emour!’ Em̦m̦aan eo ear kajjitõk: ‘Kom̦ij ke tõmak rũkanaan ro? Rar ba bwe Christ enaaj mej  im tokãlik jerkakpeje.’ Im ear wõnm̦aanl̦o̦k im kõmel̦el̦eik erro kõn Jeje ko. Ke rar tõparl̦o̦k Emmeõs, rũkal̦oor ro rar kajjitõk ippãn em̦m̦aan eo bwe en pãd wõt ippãerro. Ilo kar iien kõjota eo, em̦m̦aan eo ear jare pilawã eo. Ãlikin wõt an jar, rũkal̦oor ro ruo rej kab kile bwe e Jesus. Ak ilo iien eo wõt, ear kajju jako.

Rũkal̦oor ro ruo rar m̦õkajl̦o̦k ñan m̦weo rijjilõk ro rar ain doon ie ilo Jerusalem im erro kar ba ñan er kõn ta eo ear wal̦o̦k. Ke rej pãd ilowaan m̦weo, Jesus ear wal̦o̦k ñan er aolep. Ilo jinoin, ear pen an rijjilõk ro tõmak ke Jesus eo. Innem ear ba: ‘Lale peiũ, jibwe eõ m̦õk. Em̦õj kar je bwe Christ enaaj jerkakpeje jãn mej.’