Kema Jesús ya miktoya, se tlatominpixketl katli motokaxtiyaya José kiiljuik Pilato tlaj ueliskia kitemouis Jesús itlakayo. José kipijki o kiuijkonki Jesús itlakayo ika se kuali yoyomitl tlen kichijchijtoyaj ika lino, kitlalilik tlaajuiyajkayotl, uan kikalakik ipan se tlakoyoktli tlen amo kitekiuijtoyaj. Teipa tlanauatik ma kitsakuakaj nopa tlakoyoktli ika se ueyi tetl. Uan nopa sacerdotes kiiljuijkej Pilato: “Timoiljuiaj Jesús itokilijkauaj kiichtekisej Jesús itlakayo uan teipa kiijtosej moyolkuik”. Yeka Pilato kiniljuik: “Kuali xijtsakuakaj nopa tlakoyoktli uan xikintlalikaj tlamokuitlauianij”.

Kema panotoya eyi tonali, se keskij siuamej yajkej ika ijnalok kampa kitlalijtoyaj Jesús itlakayo. Kiitakej kiijkuinijtoyaj nopa tetl. Uan ipan nopa tlakoyoktli itstoya se iluikaejketl katli kiniljuik: “Amo ximajmauikaj. Jesús moyolkuik. Xikiniljuitij itokilijkauaj ma yakaj Galilea uan nopaya kiitasej”.

María Magdalena nimantsi kintemoto Pedro uan Juan. Uan kiniljuik: “Se akajya kiichtejki Jesús itlakayo”. Nochi motlalojkej uan yajkej kampa kitoktoyaj. Uan kema kiitakej amo tleno eltoya, tlakuepilijkej ininchaj.

Teipa, María sampa tlakuepilik. Nopaya kinitak omej iluikaeuanij uan kiniljuik: “Amo nijmati kanke kiuikakej itlakayo noTeko”. Uajka kiitak se tlakatl uan moiljuik eliyaya nopa jardinero, uan kitlajtlanilik: “Tate, xinechiljui kanke tijtlalijtok”. Kema nopa tlakatl kiiljuik: “¡María!”, uajka kiitak eliyaya Jesús. María kiijtok: “¡Tlamachtijketl!”, uan kinajnauajki. Uajka Jesús kiiljuik: “Xikiniljuiti noikniuaj tinechitstok”. Uajka María motlalojtejki, uan kiniljuito kiitstoya Jesús.

Teipa, ipan nopa tonali, omej itokilijkauaj kistejkej Jerusalén uan yajkej Emaús. Uajka se tlakatl nejnentiajki ininuaya uan kintlajtlanik tlake tlamantli mokamauiyayaj. Inijuantij kiiljuijkej: “¿Amo tijmati tlen panotok? Kipia eyi tonali nopa sacerdotes tlanauatijkej ma kimiktikaj Jesús. Nama se keskij siuamej kiijtouaj moyolkuik”. Uajka nopa tlakatl kintlajtlanilik: “¿Amo intlaneltokaj ipan tlajtolpanextianij? Inijuantij kiijtojkej Cristo kimiktiskiaj uan teipa moyolkuiskia”. Nojkia kinixtomilik  sekinok tlamantli tlen toTeotsij iTlajtol. Kema asitoj Emaús, kiiljuijkej ma mokaua ininuaya. Uan kema momaijtok pampa kikuaskiaj nopa pantsi, itokilijkauaj kimatkej eliyaya Jesús, uajka ixpolijtejki uan ayokmo kiitakej.

Cristo itokilijkauaj motlalojtiajkej ne Jerusalén. Asitoj kampa itstoyaj apóstoles uan kinpouilijkej tlen kinpanotoya. Uan kema itstoyaj kalijtik, Jesús sampa monextik ininixpa. Achtoui nopa apóstoles amo kineltokayayaj tlaj nelia eliyaya Jesús. Yeka kiniljuik: “Xikitakaj noma uan xikitskikaj. Ipan toTeotsij iTlajtol ijkuilijtok Cristo moyolkuiskia”.