Pa kufa ka Jesu, mwanarume umweni anodanwa Josefa wakakumbira Pirato kuti abvise muviri wa Jesu pa danda. Josefa wakapukutira mutembo ngo nguvo itsva zve wousia mu guva ibza. Wakaita kuti buwe guru rifunge musuvo wo guva. Vakuru vo vapiri vakabvunja Pirato kuti: ‘Tiri kuthya kuti vamwe vovajiji va Jesu vangaviya votora muviri wake zve vonanga kuti wakamuka.’ Ngo kudaro Pirato wakamubvunja kuti: ‘Diranyi cidhindo pa guva zve ringwarirenyi.’

No papera mazuva matatu, no mangwanani, vanakaji vamweni vakaenda ku guva zve vakawana kuti buwe riya rainga rabviswa. Pavakanghwina mu guva, ngirozi yakavabvunja kuti: ‘Mucathya. Jesu wamuswa. Endanyi zve bvunjanyi vajiji vake kuti vamuwane Garirea.’

Maria Madharena wakagogoma kopsaka Pedru na Johani. Iyena wakavabvunja kuti: ‘Kuna mundhu watora muviri wa Jesu!’ Pedru na Johani vakagogoma kwenda ku guva. Pavakavona kuti paainga pacina mundhu, ivona vakahwirira kanyi kwavo.

Maria paakahwirira ku guva, wakavona ngirozi mbiri jainga mukati zve iyena wakati kwajiri: ‘Andizvizivi kuti vaendesa kwapi Tenji wangu.’ Perapo wakatanga kuvona mundhu, ecirangarira kuti ndi mungwariri, anoti: ‘Ndinokumbira mundibvunjevo komamuendesa.’ Asi mwanarumewo paakati, “Maria!” iyena wakatanga kuzviziva kuti wainga Jesu. Maria wakatanga kurira eciti: “Mujijisi!” zve wakamukhwederera. Jesu wakamubvunja kuti: ‘Endai zve bvunjai hama jangu kuti vandivona.’ Ngo kukasika, Maria wakagogoma woenda ku vateveri zve wakavabvunja kuti wavona Jesu.

Pa nguva imweni, vajiji vaviri vainga vecibva ku Jerusarema kuenda ku Emausi. Mwanarume umweni wakasongana navo mu gwanja zve wotanga kufamba navo, wovabvunjisa kuti vainga vacivereketa ngo pamusoro penyi. Ivona vakapingura kuti: ‘Auna kuzwa zvakaitika here? Mu mazuva matatu akhirirari vapiri vakuru, vakaita kuti Jesu aurawe. Wari vanakaji vamweni vari kunanga kuti iyena ari penye!’ Mwanarume wakabvunjisa kuti: ‘Amutendi zvakatahwa ngo maporofeti? Ivona vakananga kuti Kristu  anodikana kufa perapo wozomuswa.’ Iyena wakaenderera mbheri ecivasanangurira Matahwa. Pavakaguma ku Emausi, vajiji vakabvunja mwanarumewo kuti aende navo. Pavainga veciitira mukumbiro pau kuti vahe, ivona vakatanga kuzwisisa kuti wainga Jesu. Ngo kukasika wakangarangara.

Vajiji vaviri vakagogoma voenda ku Jerusarema ku nyumba yaiungana vajiji vamweni zve vovabvunja zvainga zvaitika. Pavainga vari kondhoyo, mukati mo nyumba, Jesu wakabudirira vese. Pakutanga, vapostori avacaitenda kuti wainga Jesu. Perapo iyena wakati: ‘Vonanyi nyara jangu, ndibatenyi. Zvakatahwa kuti Kristu waizomuswa kubva mo kufa.’