Konima sho Jesus a si, omulumentu gumwe omuyamba, edhina lye Josef, okwi indile Pilatus omudhimba gwaJesus. Josef okwa kutha omudhimba e te gu dhingile moshiyata oshiwanawa. Okwe gu gwayeke omagadhi, e te gu langeke mombila ye mwene ompe. Posheelo shombila okwa tula po emanya enenenene. Aayambi aakuluntu oya lombwele Pilatus ya ti: ‘Otwa tila pamwe aalongwa yaJesus yamwe otaye ya okuyaka mo omudhimba gwe, e taya ti kutya okwa yumuka.’ Pilatus okwe ya lombwele a ti: ‘Hoteni ombila nawa e tamu yi langele.’

Konima yomasiku gatatu, aakiintu yamwe oye ya kombila ongula onene, noya mono kutya emanya olya kuthwa po. Omuyengeli ngoka ya adha meni lyombila, okwe ya lombwele a ti: ‘Inamu tila. Jesus ngoka a li a sa okwa yumudhwa. Ka lombweleni aalongwa ye kutya otaye mu adha kuGalilea.’

Maria Magdalena okwa yi nziya a ka konge Petrus naJohannes. Okwe ya lombwele a ti: ‘Opu na gumwe a kutha mo omudhimba gwaJesus.’ Nena Petrus naJohannes oya matukile kombila. Sho ya mono kutya oyi li owala, oya shuna komagumbo gawo.

Sho Maria a galukile kombila, okwo ontamene mo nokwa mono mo aayengeli yaali, e ta ti kuyo: ‘Kandi shi mpoka ya tula Omuwa gwandje.’ Opo nduno okwa mono omulumentu gumwe. Maria okwa li ta dhiladhila kutya ngiika oye mwene gweyana, e ta ti kuye: ‘Tatekulu lombwela ndje mpoka we mu tula.’ Sho omulumentu ngoka i ithana a ti: “Maria!” okwe mu dhimbulula kutya oJesus, e ta ti kuye: “Muhongi!” e te mu papatele. Jesus okwe mu lombwele a ti: ‘Inda wu ka lombwele aamwatate kutya owa mona ndje.’ Mbalambala Maria okwa matuka e ta yi kaalongwa, nokwe ya lombwele kutya okwa mona Jesus.

Konima aalongwa yaali oya zi kuJerusalem yu uka kuEmmaus mesiku olyo tuu ndyoka. Ohaluka omulumentu gumwe okwe ya puyo, e te ya pula shoka taya popi. Oya ti: ‘Ino uva shoka sha ningwa po? Aayambi aakuluntu oya dhipaga Jesus ngashingeyi pwa pita omasiku gatatu. Ihe ngashingeyi aakiintu yamwe otaya ti kutya oku na omwenyo.’ Omulumentu okwe ya pula a ti: ‘Ano inamu itaala aahunganeki?  Oya popya kutya Kristus ota ka sa, e ta yumudhwa.’ Okwa tsikile oku ya yelithila Omanyolo. Sho ya thiki muEmmaus, aalongwa oya pula omulumentu ngoka a kale nayo. Sho a galikana, ya lye uulalelo, oye mu dhimbulula kutya oJesus. Opo ihe okwa kana po.

Aalongwa mboka yaali oya matukile kegumbo hoka aayapostoli ya li ya gongala, li li muJerusalem. Oye ya lombwele ashihe shoka sha ningwa po. Manga ye li meni lyegumbo, Jesus okwe yi ihololele ayehe. Tango sho ye mu mono, aayapostoli oya tindi okwiitaala kutya oJesus. Opo nduno okwa ti kuyo: ‘Taleni iikaha yandje, gumii ndje. Omanyolo otaga ti kutya Kristus ota ka yumudhwa konima yomasiku gatatu.’