Me no mate Yesu, samösa ndra matua si kayo sotöi Yosefo, iʼandrö khö Wilato enaʼö labeʼe tou mboto Yesu moroi ba döla geu. Ibukusi mboto Yesu ba nukha si sökhi ba ifagule wanikha somuhua aefa daʼö möi ifadölö ba lewatö si bohou. Iduhö lewatö andrö faoma kara sebua. Lamane ira kafalo gere khö Wilato, ’Ataʼuga na lahalö mboto Yesu ira nifahaʼönia ba lamane no ifuli auri ia.’ Börö daʼö, imane Filato, ’Mihaogö wondruhö lewatö andrö ba mifatenge zanarogö.’

Tölu hari aefa daʼö, si hulö wongi sibai so ösa ndra alawe si möi ba lewatö andrö. Laʼila wa no aheta gara duhö-duhö lewatö. So bakha malaʼika ba lewatö daʼö imane khöra, ’Böi miʼataʼufi no ifuli tesusugi Yesu. Mifatunö khö ndra nifahaʼönia enaʼö lafalukhaisi ia ba Galilaia.’

Möi Maria Magadala wamalukhaisi Fetero faoma Yohane. Imane khöra, ’No lahalö mboto Yesu!’ Fagohi Wetero faoma Yohane möi ira ba lewatö. Me laʼila lö hadöi boto Yesu bakha ba lewatö, mangawuli ira ba nomora.

Me ifuli ia Maria ba lewatö andrö, iʼila darua ndra malaʼika ba daʼö. Imane khöra, ’Lö uʼila hezo laʼohe Zoʼaya yaʼo.’ Aefa daʼö, iʼila samösa ndra matua, iwalingagö sohalöwö ba kabu. Imane khönia Maria, ’He Pa, fatunö khögu hezo laʼohe Zoʼaya yaʼo.’ Hizaʼi, me iwaʼö khönia ira matua daʼö, ”He Maria!” awena iʼila wa Yesu daʼö. Muʼao Maria, ’He Samahaʼö!’ ba iʼanemaiʼö italagui. Imane khönia Yesu, ’Fatunö khö ndra talifusögu wa no öʼila ndraʼo.’ Fagohi Maria wamalukhaisi ira nifahaʼö ba ifatunö khöra wa no iʼila Yesu.

Ba zi maʼökhö daʼö, darua ndra nifahaʼö sofanö moroi ba Yeruzalema numalö ba Gemaʼusa. Samösa ndra matua zamalukhaisi yaʼira ba wanofu hadia nifadunö-dunöra. Lamane khönia, ’Hadia lö nirongomö? Tölu hari silalö no labunu Yesu ira kafalo gere. Hizaʼi so ösa ndra alawe sangumaʼö wa no ifuli auri ia!’ Imane ira matua andrö, ’No lawaʼö ira samaʼeleʼö wa mate dania Keriso, aefa daʼö ifuli tesusugi ia. Hadia lö faduhu dödömi khö ndra samaʼeleʼö?’ Aefa daʼö, ifatunö khöra nösi Mbuku Niʼamoniʼö. Me  larugi Gemaʼusa, laʼandrö khönia enaʼö fao manö ira. Me mangandrö ia ba zi bongi ba ginötö wemanga, awena laʼila wa Yesu daʼö. Aefa daʼö taya Yesu.

Laʼalio-liokö wofanö ira nifahaʼö si darua andre, numalö ira ba Yeruzalema. Lafatunö khö ndra sinenge si no owulo ba zi sambua omo hadia zalua. Aefa daʼö, tohare manö Yesu fönara. Ba wamobörö, lö faduhu dödö ndra sinenge wa Yesu daʼö. Imane khöra Yesu, ’Mifaigi dangagu. Mibabaya ndraʼo. So ba zura wa ifuli tesusugi Keriso.’