Ka morago ga gore Jesu a hwe, monna wa mohumi yo a bitšwago Josefa o ile a kgopela Pilato gore a mo dumelele go tloša setopo sa Jesu koteng yeo a bego a kokotetšwe go yona. Josefa o ile a phuthela setopo sa Jesu ka lešela le lebotse gomme a se bea ka lebitleng la gagwe le leswa. O ile a tswalela lebitla leo ka leswika le legolo. Baperisita ba bagolo ba ile ba botša Pilato ba re: ‘Ga re tshepe barutiwa ba Jesu. Re nagana gore ba ka tla ba tšea setopo sa gagwe, gomme ba re o tsogile bahung.’ Ka gona Pilato a re go bona: ‘Tswalelang lebitla leo, gomme le se ke la tloga moo go lona.’

Ka morago ga matšatši a mararo Jesu a hwile, basadi ba bangwe ba ile ba tsoga ka masa gomme ba ya lebitleng la Jesu. Ge ba fihla moo, ba ile ba hwetša le bulegile. Ge ba lebelela ka gare ga lona, ba bona morongwa, gomme a re go bona: ‘Le se ke la tšhoga. Jehofa o tsošitše Jesu bahung. Eyang le yo botša barutiwa ba gagwe gore ba ye ba kopane le yena kua Galilea.’

Maria Magdalena a kitima gomme a yo nyaka Petro le Johane. Ge a ba hweditše a re go bona: ‘Go na le motho yo a tšerego setopo sa Jesu!’ Ke moka Petro le Johane ba kitimela lebitleng la Jesu. Ge ba hwetša gore lebitla leo ga le na selo, ba boela magaeng a bona.

Maria o ile a boela lebitleng leo gape. O ile a bona barongwa ba babedi ka gare ga lona gomme a re go bona: “Ba tšere Morena wa ka gomme ga ke tsebe moo ba mmeilego gona.” Ka morago ga moo, a bona monna yo mongwe gomme a nagana gore ke mohlokomedi wa lefelo leo, ke moka a mmotšiša a re: “Mohlomphegi, ge e ba o mo tšere, mpotše mo o mmeilego gona.” Eupša monna yoo a re: “Maria!” Ka yona nako yeo, Maria a kwa gore monna yoo ke Jesu, gomme a goeletša a re: “Morutiši!” ke moka a mo gokarela. Jesu a re go yena: ‘Sepela o yo botša barutiwa ba ka gore o mpone.’ Maria a kitima a ya a botša barutiwa bao gore o bone Jesu.

Ka morago letšatšing leo, barutiwa ba babedi ba Jesu ba be ba etšwa Jerusalema gomme ba eya Emause. Ge ba dutše ba sepela, monna yo mongwe o ile a thoma go sepela le bona gomme a ba botšiša gore ba bolela ka eng. Ba re go yena: ‘Kgane ga se wa kwa? Matšatšing a mararo ao a fetilego, baperisita ba bagolo ba bolaile Jesu. Ga bjale basadi ba bangwe ba re o a phela!’ Monna yoo a ba botšiša a re: ‘Lena le reng? Na seo baporofeta ba se boletšego le a se dumela? Baporofeta ba boletše gore Kriste o be a tlo hwa gomme Modimo a mo tsoša bahung.’ Monna yoo o ile a  tšwela pele a ba hlalosetša seo mangwalo a se boletšego. Ge ba fihla motsaneng wa Emause, barutiwa bao ba ile ba kgopela monna yoo gore a dule le bona. Ka morago ga gore monna yoo a rapelele dijo tša bona tša mantšiboa, e ile ya ba gona ba bonago gore ke Jesu. Ka yona nako yeo, Jesu a nyamelela.

Barutiwa bao ba babedi ba ile ba kitimela ntlong yeo barutiwa ba bangwe ba Jesu ba bego ba le go yona kua Jerusalema, gomme ba fihla ba ba botša seo se diragetšego. Ge ba sa le ka ntlong yeo, Jesu a tšwelela gare ga bona. Mathomong, barutiwa ba gagwe ba be ba sa tshepe gore ke yena. Ka gona a re go bona: ‘Ke nna. Bonang diatla tša ka. Mangwalo a boletše kgale gore Kriste o be a tla tsoga bahung.’