Bwanyima y’okufa kwa Yesu, omushaija omutungi orikwetwa Yosefu akashaba Pilaato kwiha omutumbi gwa Yesu aha muti. Yosefu akazinga omutumbi gwa Yesu omu mwenda gwa kitaani kandi yaaguta omu kituuro kisya. Akataho eibaare rihango aha muryango. Abanyamurwa abakuru bakagira Pilaato bati: ‘Nitutiina ngu bamwe aha beegi ba Yesu nibaija kumwiba haza bagire ngu azookire.’ N’ahabw’ekyo Pilaato akabagira ati: ‘Mukinge ekituuro kandi mukirinde.’

Bwanyima y’ebiro bishatu, omu kasheeshe kare, abakazi abamwe bakaza aha kituuro kandi bakashanga eibaare ritariho. Maraika akagambira abakazi abo ati: ‘Mutatiina. Yesu azookire. Mugyende mugambire abeegi be kumubugana Galilaaya.’

Mariamu Magadaleene akairuka yaaza kusherura Petero na Yohaana. Akabagira ati: ‘Hariho otwire omutumbi gwa Yesu.’ Petero na Yohaana bakarahuka kuza aha kituuro. Ku baashangire omu kituuro atarimu, bakagaruka omu maka gaabo.

Mariamu ku yaagarukire aha kituuro, akareeba baamaraika babiri yaabagira ati: ‘Tindikumanya ahu batwire Mukama wangye.’ Bwanyima ku yaareebire omushaija, ou yaabaire naateekateeka ngu n’omuhingi, akamugira ati: ‘Nyabura ’we ngambira ahu omutwire.’ Kwonka omushaija ogwo ku yaamwetsire eiziina ati: “Mariamu.” Mariamu akamanya ngu akaba ari Yesu. Mariamu akamugarukamu ati: “Omwegyesa!” kandi akeenda ngu agume nawe. Yesu akamugira ati: ‘Gyenda ogambire beene tata ngu wandeeba.’ Ahonaaho, Mariamu akagyenda yaagambira entumwa ngu yaareeba Yesu.

Bwanyima omu ihangwe, abeegi be babiri bakaba nibaruga Yerusaalemu nibaza Emau. Omushaija akabegaitaho omu muhanda kandi yaababuuza eki baabaire nibagambaho. Bakamugarukamu bati: ‘Tihaine eki waahuriire? Ebiro bishatu enyima, abanyamurwa abakuru baitsire Yesu. Kandi bamwe aha bakazi nibagira ngu ahuriire.’ Omushaija akababuuza ati: ‘Ti murikwikiriza baanabi? Bakagira ngu Kristo akaba naija kufa kandi azookye.’ Akagumizamu  kubashoboororera Ebyahandiikirwe. Ku baahikire Emau, abeegi bakeeta omushaija ogwo ngu agyenda nabo. Aha kiihuro, ku yaaherize kushabira omugaati, bakamanya ngu ni Yesu. Reero yaabura.

Abeegi babiri abo bakarahuka baaza Yerusaalemu omu nju ahu entumwa baabaire beeteeraniire kandi babagambira ekibaireho. Ku baabaire bari omu nju boona, Yesu akabeeyoreka. Omu kubanza, entumwa tibaraikiriize ngu akaba ari Yesu. Bwanyima akabagira ati: ‘Mureebe engaro zangye; mukwateho. Kikahandiikwa ngu Kristo akaba naija kuzooka omu bafu.’