Aus Jesus jestorwen wia, jinkj een rikja Maun, waut Josef heet, no Pilatus un fruach, aus hee Jesus kunn vom Pol raufnämen. Josef besorjd dän met feinet Lienzeich un Kjriedarie un läd dän en een nieet Grauf nenn. Ver daut Grauf leet hee eenen schwoaren Steen hanrollen. De väaschte Priestasch säden to Pilatus: “Wie beduaren, aus eenje von Jesus siene Jinja dän Kjarpa nich woaren metnämen un dan sajen, daut dee wada läft.” Pilatus säd: “Vesechat daut Grauf un bewoakt daut.”

Dree Doag lota jinjen waut Frues tiedich no daut Grauf un sagen, daut de Steen wajchjerolt wia. En daut Grauf säd een Enjel to dee: “Habt nich Angst. Jesus es vom Doot oppjestonen. Got un sajcht siene Jinja, see sellen dän en Galiläa trafen.”

Maria Magdalena rand un socht sikj Petrus un Johanes. See säd to dee: “Irjentwäa haft sikj Jesus sienen Kjarpa metjenomen!” Petrus un Johanes randen nom Grauf. Aus dee sagen, daut et ladich wia, jinjen see trigj no Hus.

Aus Maria trigj nom Grauf kjeem, sach see twee Enjel doabennen un see säd to dee: “Ekj weet nich, wua se mienen Harn hanjelajcht haben.” Dan sach see eenen Maun un docht, daut wia de Goadenbesorja. See säd to dän: “Har, saj mie toom Jefaulen, wua du dän hanjebrocht hast.” Oba aus de Maun säd: “Maria!”, hieed see, daut et Jesus wia. See säd lud: “Liera!”, un see pakt dän om. Jesus säd to dee: “Go un saj miene Breeda, daut du mie jeseenen hast.” Maria rand fuaz no de Jinja un vetald dee daut.

Lota dänselwjen Dach jinjen twee Jinja von Jerusalem no Emmaus. Hinjawäajes jinkj een Maun met dee met un fruach dee, von waut see jerät hauden. Dee säden: “Hast du daut noch nich jehieet? Dree Doag trigj leeten de väaschte Priestasch Jesus dootmoaken. Oba eenje Frues sajen nu, daut dee wada läft!” De Maun fruach: “Jleew jie de Profeeten nich? Dee säden, daut de Christus stoawen wudd un vom  Doot oppstonen.” Hee läd dee noch mea von de Schreft ut. Aus dee bat Emmaus wieren, wullen de Jinja haben, dis Maun sull met an metkomen. Ea see Owentkost eeten, bäd dee fa daut Broot, un doa worden see en, daut et Jesus wia. Dan veschwunk dee.

De twee Jinja randen no daut Hus en Jerusalem, wua de Apostel toopjekomen wieren, un vetalden dee, waut see beläft hauden. Aus dee doa em Hus bennen wieren, kjeem Jesus doa met eenst mank dee aula. Fuaz kunnen de Apostel daut nich jleewen, daut et Jesus wia. Oba Jesus säd: “Kjikjt no miene Henj; schieet mie aun. Daut wia je jeschräwen, daut de Christus wudd vom Doot oppstonen.”