Josë jutiyoq rïcu nunam Pilätuta permïsuta mañakurqan Jesuspa ayanta qerupita jorqarinampaq. Nïkurmi lïnupita rurashqa fïnu y perfumashqa tëlawan Jesuspa ayanta wankurir, qaqachö uchkushqa mushoq sepultüraman churarqan. Y juk jatun rumiwanmi tsapatsirqan. Peru precisaq sacerdötikunaqa kënömi Pilätuta niyarqan: “Jesuspa qateqninkuna ayanta suwëkur, ‘kawarimushqam’ niyänantam mantsayä”. Tsënam Pilätuqa, “sepultüranta alleq seguratsiyë y guardiakunawan täpatsiyë” nirqan.

Tsëpita kima (kimsa) junaqtam, patsa waraqlla ishkë warmikuna Jesuspa sepultüranman ëwayarqan. Y kicharëkaqtam Jesuspa sepultüranta tariyarqan. Y juk angeltam rurichö rikäriyarqan. Pëmi kënö nirqan: “Ama mantsakäyëtsu. Jesusqa kawarishqam. Qateqninkunata willayë Galilëachö tinkuyänampaq”.

Marïa Magdalënaqa Pëdrutawan Juanta asheqmi jinan höra ëwakurqan. Y taririrmi, “Jesuspa ayantam pichi apakushqa” nirqan. Tsënam Pëdruwan Juanqa sepultüra rikaq ëqipa ëwayarqan. Y Jesuspa ayanta mana tarïkurmi wayinkunata kutikuyarqan.

Marïaqa yapëmi sepultüraman kutirqan. Y tsëchö ishkë angelkunata rikärirmi, “¿mëmantaq Señornïta apakuyarqunki?” nirqan. Nïkurmi juk nunata rikëkur jardinëru kanqanta pensarqan. Tsëmi, “teytë, mëman churanqëkita willëkallämë” nirqan. Tsënam, “¡Marïa!” niptin, Jesus kanqanta cuentata qokurirqan. Y, “¡Maestru!” nirmi pëpita tsaripukurkurqan. Jesusqa, “rikämanqëkita wawqïkunata willë” nirqanmi. Y Marïaqa ëqipam Jesuspa qateqninkunata asheq ëwarqan, y taririrmi, “Jesustam rikarqö” nirqan.

Tsë tardim Jesuspa ishkë qateqninkuna Jerusalenpita Emausta kutikïkäyarqan. Y juk nunam pëkunawan ëwar qallëkurqan, y imapaq parlëkäyanqantam tapurqan. Tsënam pëkunaqa, “¿manaku wiyarqunki? Kananwanqa kima junaqnam kanqa precisaq sacerdötikunapa culpanrëkur Jesusta wanutsiyanqampita. Peru juk ishkë warmikunam nikäyan kawarishqa kanqanta” niyarqan. Tsënam tsë nunaqa, “¿manaku creiyanki Diospa willakoqninkuna willakuyanqanta? Pëkunaqa Cristu  wanunampaq kaqta y kawarinampaq kaqtam niyarqan” nirqan. Nïkurmi Diospa Palabrampita maskunata entienditsirqan. Y Emausman chärirqa, “quedakushun” nirmi tsë nunata quedatsiyarqan. Y tsë nunaqa cenë höram tantata tsarirkur Diosta agradecikurirqan. Tsëchömi cuentata qokuriyarqan Jesus kanqanta. Y Jesusqa tsë höram illaririrqan.

Tsënam tsë ishkan qateqninkunaqa Jerusalenman jinan höra ëwayarqan. Y llapan apostolkuna juntarëkäyanqan wayiman chärirmi llapan pasakunqankunata willakuyarqan. Y wayi rurinchö këkäyaptinmi Jesus yuririrqan. Peru apostolkunaqa manam rasllatsu creiriyarqan Jesus kanqanta. Tsënam Jesusqa kënö nirqan: “Ishkan makïta rikäyë y yatayë. Qellqashqam këkarqan Cristu wanurir kawarimunampaq kaq”.