Jesús ña huañujpica achcata charij José shuti runami Pilatotaca, ‘Jesuspaj cuerpota caspimanta uriyachingapaj permisota cuhuai’ nirca. Joseca linomanta rurashca linsohuan, mishquijlla qꞌuihuacunahuanmi Jesuspaj cuerpota pilluchishpa shuj mushuj jutcupi churarca. Qꞌuipaca jatun rumihuan jutcuta tapachunmi mandarca. Sacerdotecunata mandajcunaca Pilatomanca, ‘discipulocuna Jesuspaj cuerpota shuhuashpaca “paica causarircami” ninatami manchanchij’ nircacunami. Chaimi Pilatoca, ‘jutcupi rumita alli cavichishpa, cuidajcunata churaichij’ nirca.

Quimsa punlla pasashca huasha ña pacaricujpimi jutcuta ricunaman huaquin huarmicuna rirca. Chaiman chayashpaca rumita anchuchishcatami ricurcacuna. Chai jutcu ucupica shuj angelmi tiyacurca. Paica, ‘ama manchaichijchu. Jesusca causarishcami. Galileapi paihuan tupanacuchun discipulocunaman huillagrichij’ nircami.

Chaicamaca María Magdalenaca Pedrota Juantapish mashcanamanmi rishca carca. Paicunamanca, ‘Jesuspaj cuerpotaca apashcacunamari’ nircami. Chaimi Pedropish Juanpish jutcuman callpashpa rircacuna. Jutcu chushajlla cajta ricushpami huasiman tigrarcacuna.

Qꞌuipaca Mariaca jutcumanmi tigrarca. Jutcu ucupi ishqui angelcunata ricushpami, ‘ñuca amitota maimanchari aparcacuna’ nirca. Chai huashaca shuj cꞌaritami ricurca. Huertata allichij runa cashcata yuyashpami, ‘¿Jesusta maipitaj churarcangui? huillahuai’ nirca. Paica, ‘¡María!’ nircami. Shina nijpimi Jesús cashcata cuentata curca. Chaimi, ‘¡Yachachij!’ nishpa ugllarirca. Jesusca, ‘ñuca huauquicunaman ñucata ricushcata huillagri’ nircami. Chai ratomi Mariaca callpashpa rirca. Chayashpaca Jesusta ricushcatami discipulocunaman huillarca.

Chai punllallatajmi ishqui discipulocunaca Jerusalenmanta Emaús puebloman ricurcacuna. Chaipimi shuj runa paicunahuan puri callarirca. Imata parlanacucushcata tapujpimi discipulocunaca, ‘¿manachu uyashcangui? quimsa punllacuna huashamanmi sacerdotecunata mandajcunaca Jesusta huañuchichun mandarca. Cunanca huaquin huarmicunaca “Jesusca causarishcamari” nincunami’ nircacuna. Shina nijpimi chai runaca, ‘profetacunaca Cristoca huañuna cashcata, causarina  cashcatami huillarcacuna. ¿Chaitaca manachu cringuichij?’ nirca. Shinallataj Quillcashcapi imalla nicushcatapish parlashpami catirca. Ña Emaús puebloman chayashpaca chai runataca ñucanchijhuan saquirilla nircacunami. Qꞌuipaca chai runaca micungapajmi Diosta mañarca. Chaipimi discipulocunaca Jesús cashcata cuentata curcacuna. Jesusca chai ratomi paicunapaj ñaupajmanta chingarirca.

Ishqui discipulocunaca Jerusalenmanmi callpashpa rircacuna. Shuj huasipimi apostolcunaca tandanacushca carcacuna. Chaiman chayashpami imalla tucushcata huillarcacuna. Paicuna huasi ucupi cajpirajmi Jesusca ñapish ricurirca. Pai cashcata mana crircacunachu. Shinapish Jesusca, ‘ñuca maquita japishpa ricuichij. Quillcashcapica Cristoca huañushcacunapaj chaupimanta causarinatami huillarca’ nircami.