Jesus wañukuptinmi Josey sutiyuq apu runa Pilatota niykuspan, Jesuspa cuerponta pampananpaq machayman aparqa. Jesuspa cuerpontam fino telawan hinaspa miski asnaq qurakunawan wankuruspa pamparqa, hinaspam hatun rumiwan tapachirqa. Riqsisqa sacerdotekunañataqmi Pilatota nirqaku: “Jesuspa cuerponta suwaruspankum ‘kawsariramunmi’ niwanchikman, chaymi imallatapas ruwananchik”, nispa. Pilatoñataqmi soldadokunata kamachirqa machayta qawanankupaq.

Kimsa punchawmantam tutapaylla Jesuspa kasqanman warmikuna rirqaku, hinaspam tarirurqaku rumita suchuchisqataña. Chaypim warmikunata Diospa angelnin nirqa: “Ama manchakuychikchu, Jesusqa kawsarirunmi. Qatiqninkunatayá nimuy Galileaman rispa Jesuswan tupanankupaq”, nispa.

Hinaptinmi Maria Magdalenaqa chaylla Pedrotawan Juanta tariruspan nirqa: “Jesuspa cuerpontam aparusqaku”, nispa. Chaymi qawaq kallparqaku. Ichaqa Jesuspa cuerponta mana tarispankum kutikurqaku wasinkuman.

Mariañataqmi uchkuta qawaykuspan rikururqa iskay angelkunata, hinaspam nirqa: “Jesuspa cuerpontam maskachkani”, nispa. Hinaspanmi huk runata rikururqa, huerta allichaq kasqanta piensaspanmi nirqa: “Niykullaway taytáy, maymantaq churarunki”, nispa. Chay runa rimapayaykuptinmi Mariaqa musyarurqa Jesus kasqanta, hinaspam hapipakururqa. Jesusñataqmi nirqa: “Willamuy wawqiykunaman rikuwasqaykimanta”, nispa. Chaymi Mariaqa chaylla willakuq rirqa.

Chay tardellam Jesuspa iskay qatiqninkunaqa Jerusalenmanta Emaus sutiyuq llaqtaman richkarqaku. Hinaptinmi huk runa imamanta rimasqankuta tapuspan asuykurqa, paykunañataqmi nirqaku: “¿Manachu yachanki? Ñam kimsa punchawña Jesusta wañurachisqankuqa, warmikunam rimachkanku kawsariramusqanmanta”, nispa. Chaymi chay runa nirqa: “Diosmanta willakuqkunam nirqaku Diospa  akllasqan runa kawsarimunanmanta, ¿iskayrayankichikchu chaymanta?”, nispa. Hinaspam Diosmanta aswanraq yachachirqa. Emaus llaqtaman chayaruptinkum paykunawan mikuspan chay runaqa tantata hapiykuspa Diosta mañakurqa, chaymi chayraq musyarurqaku chay runaqa Jesus kasqanta. Hinaptinmi Jesusqa chinkarurqa.

Chaymi Jesuspa chay iskay qatiqninkunaqa utqaylla Jerusalenman kutispanku apostolkunaman willarqaku. Hinaptinmi chay wasipi kachkaptinku Jesusqa rikuriykurqa. Jesus kasqanmanta iskayrayaptinkum paykunata Jesus nirqa. “Qillqasqam karqa Diospa akllasqan runa kawsarimunanmanta. Makiytapas qawaykuychik”, nispa.