Jesús huañushca jipaca, ‘shuj ninan charij José shuti runami’, ‘Jesús huañushcata pambagringapaj’ Pilatohuan parlarca. ‘Jesús huañushcata apashpaca, mishquillagu ashnajuj jambita fachacunapi javishpami pilluchirca’. Shinami ‘mushuj utujupi Jesustaca churarca’. Chai jipaca ‘shuj jatun rumita suchuchishpami, chai utuju punguta’ taparca. ‘Curacunata mandajcunaca Pilatotaca’ nircami: ‘Paipa yachajujcunara tuta shamushpa, chai huañushcata shuhuashpa apanman. Chashna apashpaca: Huañushcacunapa chaupimanda causarircami nishpami, tucui gentecunaman llullashpa villanajunga’ nishpa. Chaimi Pilatoca nirca: ‘Chai utujutaca, ali ali sellashpa cuidaj soldadocunata churaichi’ nishpa.

Quimsa punlla jipami, shuj huarmicunaca Jesusta pambashca utujuman tutamandata rishpa chai jatun rumita suchuchishcata ricurca. Chai utuju ucupica shuj angelmi paicunataca nirca: Ama manllaichichu ‘paica ña causarishcami’. ‘Paipa yachajujcunaman ucha villagrichi. Galilea llactapimi paitaca ricunguichi’ nishpa.

María Magdalenaca Pedrota, Juanda mascagrishpami cashna nirca: “Jesustaca utujumanda apashcamari” nishpa. Chaimi Pedropash, Juanbash Jesusta pambashca utujuman calpashpa rirca. Chai utujupi pipash illajta ricushpami paicunapa huasiman tigrarca.

Jipamanga Mariaca Jesusta pambashca utujumanmi tigrarca. Chaipimi, ‘ishcai angelcunata ricushpa’ nirca: Jesustaca ‘maiman aparcacha na yachapanichu’ nishpa. Chai jipaca shuj jarita ricushpami ‘huertata cuidaj runami yashpa cashna nirca: Ñucata Mandajlla, Jesús huañushcata maipi churangapaj apashca cashpaca villahuailla’ nishpa. Shina nijhuanmi chai jarica María nirca. Shina nijpimi paica Jesús cashcata cuenta japishpa, Yachachij nishpa ugllarirca. Chaimi Jesusca nirca: Ñucata ricushcata ñuca huauquicunaman uchalla villagripai nishpa. Shina nijpimi ‘María huarmiguca Jesusta ricushcataca’ ‘Jesuspa yachajujcunaman villangapaj rirca’.

Chai punlla ña chishi cajpimi Jesuspa ishcai catijcunaca Jerusalenmanda Emaús puebloman rinajurca. Chaimi shuj jari paicunahuan igual purishpa rijurca. Chaipimi chai jarica ¿imatata parlanajunguichi nishpa tapurca? Chaimi paicunaca nirca: ‘¿Narachu imatapash yachangui?’. Sacerdotecunata mandajcuna Jesusta huañuchichun mandashcamandaca ñami quimsa punlla yalishca. Huaquin huarmicunaca Jesusca causarishcami ninajunmi. Chaimi chai jarica nirca: ‘¿Dios ima nishcata villajcuna villashcataca nachu tucui shunguhuan cringuichi?’. Paicunaca nishcami, Cristoca huañunami, jipaca causachi tucunami carca nishpa. Jipamanga chai jarica Diospa Shimimandami ashtahuan paicunaman intindichijurca. Ña Emaús  puebloman chayashpaca caipi quedai ninajurcami. Micungapaj ña tiarishpaca tandamandami chai jarica Diosta pagui nirca. Chaimi paicunaca Jesús cajta cuenta japirca. Shinapash Jesusca paicunapa ñavimandaca ñapashmi chingarca.

Jesuspa ishcai catijcunaca Jerusalén llactamanmi apostolcuna tandanajushca huasiman uchashpa rirca. Chaipimi tucui ima pasashcata villanajurca. Chai huasipi cajpimi Jesusca ricurirca. Apostolcunaca Jesús cashcataca na cri ushanajurcachu. Chaimi Jesusca nirca: ‘Ñuca maquita tacarishpa ricuichilla’. Diospa Shimipimi nishca carca ‘Cristoca huañuchi tucushpa quimsa punllahuanga huañushcacunapa chaupimanda causaringami’ nishpa.