Откеда муло о Исус, јекх барвало мануш со викинела пе сине Јосиф пучља е Пилате дали шај те лел лескоро тело таро стубо. О Јосиф паќарѓа е Исусескоро тело ко чисто лен хем мирисија хем чхивѓа ле ко нево гробо. Пало адава, ко влези таро гробо чхивѓа баро бар. О главна свештеникија вакерѓе е Пилатеске: „Шај некој таро е Исусескере ученикија те чорен лескоро тело хем пало адава те вакерен кај ов тано палем џивдо“. Адалеске, о Пилат вакерѓа ленге: „Пханден шукар о гробо хем чхивен стражарија“.

Пало трин диве, рано сабајле несаве ромња геле ко гробо хем дикхле кај о бар тано цидимо таро влези. Андре јекх ангели вакерѓа е ромњенге: „Ма даран. О Исус воскреснинѓа. Џан хем вакерен лескере учениконге те џан ки Галилеја те шај те дикхен пе леа“.

И Марија Магдалена гели те аракхел е Петаре хем е Јоване. Ој вакерѓа ленге: „Некој леља е Исусескоро тело!“ О Петар хем о Јован одма прастандиле ко гробо. Кеда дикхле кај о гробо чучо, иранѓе пе кхере.

Кеда и Марија палем гели ко гробо, андре сине дуј ангелија. Ој вакерѓа ленге: „На џанава кај ингарѓе ме Господаре“. Тегани дикхља јекхе мануше хем мислинѓа кај тано о градинари. Адалеске вакерѓа леске: „Молинава тут вакер манге кај ингарѓан ле“. Ама, кеда ов вакерѓа лаке: „Марија!“, ој халили кај адава тано о Исус. Тегани радосно викинѓа: „Учителе!“, хем гушинѓа ле. О Исус вакерѓа лаке: „Џа ко ме пхраља хем вакер ленге кај дикхљан ман“. И Марија одма гели ко ученикија хем вакерѓа ленге кај дикхља е Исусе.

Покасно ко исто диве, дуј ученикија џана сине таро Ерусалим ко Емаус. Ко друмо ало ленцар јекх мануш хем пучља лен башо со керена лафи. Ола вакерѓе: „На шунѓан? Англедер трин диве о свештеникија мударѓе е Исусе. А акана несаве ромња вакерена кај тано џивдо!“ О мануш вакерѓа ленге: „Зарем на верујнена е пророконге? Ола вакерѓе кај о Христос ка мерел хем кај ка воскреснинел“. Пало адава, почминѓа те објаснинел ленге  јавера да буќа таро Списија. Кеда ресле ко Емаус, о ученикија викинѓе е мануше те авел ленцар. Англедер те хан вечера, ов молинѓа пе башо маро хем ола халиле кај ов тано о Исус. Тегани таро јекх пути нашавдило.

О дуј ученикија сигате геле ко Ерусалим ко кхер коте со сине кхедиме о апостолија хем вакерѓе ленге со уло. Џикоте сине андре, англи ленде појавинѓа пе о Исус. Ко почеток, о апостолија нашти сине те верујнен кај адава о Исус. Ама, ов вакерѓа ленге: „Дикхен ме васта, пипинен ман. Пишимо тано кај о Христос ка воскреснинел таро муле“.