Otkeda mulo o Isus, jekh barvalo manuš so vikinela pe sine Josif pučlja e Pilate dali šaj te lel leskoro telo taro stubo. O Josif pakjargja e Isuseskoro telo ko čisto len hem mirisija hem čhivgja le ko nevo grobo. Palo adava, ko vlezi taro grobo čhivgja baro bar. O glavna sveštenikija vakergje e Pilateske: „Šaj nekoj taro e Isuseskere učenikija te čoren leskoro telo hem palo adava te vakeren kaj ov tano palem dživdo“. Adaleske, o Pilat vakergja lenge: „Phanden šukar o grobo hem čhiven stražarija“.

Palo trin dive, rano sabajle nesave romnja gele ko grobo hem dikhle kaj o bar tano cidimo taro vlezi. Andre jekh angeli vakergja e romnjenge: „Ma daran. O Isus voskresningja. Džan hem vakeren leskere učenikonge te džan ki Galileja te šaj te dikhen pe lea“.

I Marija Magdalena geli te arakhel e Petare hem e Jovane. Oj vakergja lenge: „Nekoj lelja e Isuseskoro telo!“ O Petar hem o Jovan odma prastandile ko grobo. Keda dikhle kaj o grobo čučo, irangje pe khere.

Keda i Marija palem geli ko grobo, andre sine duj angelija. Oj vakergja lenge: „Na džanava kaj ingargje me Gospodare“. Tegani dikhlja jekhe manuše hem mislingja kaj tano o gradinari. Adaleske vakergja leske: „Molinava tut vaker mange kaj ingargjan le“. Ama, keda ov vakergja lake: „Marija!“, oj halili kaj adava tano o Isus. Tegani radosno vikingja: „Učitele!“, hem gušingja le. O Isus vakergja lake: „Dža ko me phralja hem vaker lenge kaj dikhljan man“. I Marija odma geli ko učenikija hem vakergja lenge kaj dikhlja e Isuse.

Pokasno ko isto dive, duj učenikija džana sine taro Erusalim ko Emaus. Ko drumo alo lencar jekh manuš hem pučlja len bašo so kerena lafi. Ola vakergje: „Na šungjan? Angleder trin dive o sveštenikija mudargje e Isuse. A akana nesave romnja vakerena kaj tano dživdo!“ O manuš vakergja lenge: „Zarem na verujnena e prorokonge? Ola vakergje kaj o Hristos ka merel hem kaj ka voskresninel“. Palo adava, počmingja te objasninel lenge  javera da bukja taro Spisija. Keda resle ko Emaus, o učenikija vikingje e manuše te avel lencar. Angleder te han večera, ov molingja pe bašo maro hem ola halile kaj ov tano o Isus. Tegani taro jekh puti našavdilo.

O duj učenikija sigate gele ko Erusalim ko kher kote so sine khedime o apostolija hem vakergje lenge so ulo. Džikote sine andre, angli lende pojavingja pe o Isus. Ko početok, o apostolija našti sine te verujnen kaj adava o Isus. Ama, ov vakergja lenge: „Dikhen me vasta, pipinen man. Pišimo tano kaj o Hristos ka voskresninel taro mule“.