Palo e Isuseso meribe, jekh barvalo manuš kova vičindža pe Josif pučlja e Pilate te mukhel lje te huljavi e Isuseso telo kotar o stubo. O Josif pačardža lje ko jekh čaršafi razno biljkencar hem čhivdža lje ko jekh nevo grobo. Ko ulaz ando odova grobo čhivdža jekh pharo bar. O sveštenička glavarija phendže e Pilatese: „Amen daraja so neko ando e Isusese učenikija ka ljel oljeso telo hem palo odova ka phenel so irindža pe ko dživdipe.“ Odoljese o Pilat phendža ljendže: „Džan hem arakhen o grobo najšukar so šaj.“

Trin dive palo odova, rano sabalje, disave romnja dželje ko grobo hem arakhlje o grobo phravdo. Andre ko grobo, jekh anđeo phendža ljendže: „Ma daran. O Isus uštilo. Džan hem phenen oljese učenikonendže so šaj te arakhen lje ki Galileja.“

I Marija Magdalena sidžardža te arakhi e Petare hem e Jovane. Ked arakhlja ljen, phendža ljendže: „Neko ljelja e Isuseso telo!“ O Petar hem o Jovan prastandoj dželje dži o grobo. Ked dikhlje soj tano o grobo čučo, on irindže pe ko peklje čhera.

Ked i Marija irindža pe ko grobo, dikhlja duje anđelen andre ko grobo hem phendža ljendže: „Na džanava kuri igardže me Gospode.“ Tegani dikhlja jekhe manuše, hem mislindža so ov čerela buti ki bašta, hem phendža ljese: „Gospodine, molinava tut, phen maje kuri igardžen lje.“ Ama, ked o manuš phendža: „Marija!“, oj haljilji soj tano ov o Isus. Oj ko glaso phendža: „Učitelju“, hem zagrlindža lje. O Isus phendža lače: „Dža hem phen me phraljendže so dikhljan man.“ Oj odmah prastandoj dželji ko apostolija hem phendža so dikhlja e Isuse.

Hari palo odova, duj učenikija dželje phirindoj kotar Jerusalim dži ko gav kova vičindža pe Emaus. Jekh manuš isto hine oljencar phirindoj ko odova drumo hem pučlja ljen sostar vačerena. On phendže ljese: „Na šundžan? Angljeder trin dive, o sveštenička glavarija mudardže e Isuse. A akana disave romnja phenena so dikhlje lje soj tano dživdo!“ O manuš pučlja ljen: „Da li verujinena  ko prorokija? On phendže so o Isus ka merel hem paljem ka uštel.“ Ov nastavindža te objasnini ljendže hem avera buča kotar Ljila. Ked reslje ko Emaus, o učenikija pučlje odolje manuše te avel oljencar. Ked molindže pe te han maro, on haljilje so odova manuš hine o Isus. Tegani ov našaldilo anglo oljende.

Odola duj učenikija sidžardže te džan ko Jerusalim, ko čher kuri hine o apostolija hem te phenen ljendže so hine. Dži on hine othe, ko odova čher, o Isus pojavindža pe anglo sarinende. Ki početka, o apostolija naštindže te verujinen soj tano odova o Isus. Ov phendža: „Dikhen me vasta, pipinen man. Pisimo hine so o Hrist ka uštel ando meribe.“