Pidafa Yezu, mamuna wakupfuma akhacemerwa Zuze aphemba Pilato toera antawirise kubulusa manungo a Yezu pamuti. Zuze apyangirira manungo a Yezu na nguwo yadidi, aakhwaza mafuta, mbaaikha mu nthumbi ipswa. Iye aikha mwala wakulemera pansuwo wa nthumbi. Akulu a anyantsembe apanga Pilato: ‘Tisagopa kuti anyakupfundza a Yezu anabwera dzakwata manungo ace mbadzalonga kuti alamuka muli akufa.’ Natenepa Pilato aapanga: ‘Sankhulani anyakuonera toera aonere nthumbi yace.’

Pakupita ntsiku zitatu, Mariya Madhalena na nkazi unango aenda ku nthumbi namacibese kakamwe mbagumana kuti mwala wabuluswa. Anju m’bodzi akhali nkati mwa nthumbi apanga akazi anewa kuti: ‘Lekani gopa. Yezu alamuswa muli akufa. Ndokoni kapanga anyakupfundzace toera akaonane naye ku Galileya.’

Mariya Madhalena athamanga toera kapanga Pedhru na Juwau. Pidafika iye aapanga: ‘Alipo adakwata manungo a Yezu!’ Pedhru na Juwau athamanga mbaenda ku nthumbi. Pidakhonda iwo kugumana cinthu, abwerera m’manyumba mwawo.

Pidabwerera Mariya ku nthumbi, aona aanju awiri mu nthumbi. Mariya apanga aanju: ‘Ine nkhabe dziwa kudaendesa iwo Mbuyanga.’ Pidamala iye kulonga aona mamuna m’bodzi. Iye anyerezera kuti mamuna unoyu ndi nyakutsalakana mbuto ineyi, mbampanga: ‘Mbuya, ndaphata miyendo, ndipangeni kudamuikha imwe.’ Mbwenye pidalonga mamuna kuti, ‘Mariya!’ iye adzindikira kuti akhali Yezu. Mariya alira: ‘Mpfundzisi!’ mbankhumbatira. Yezu ampanga: ‘Ndoko kapange abale anga kuti wandiona.’ Na thangwi ineyi, Mariya athamanga kuenda kapanga anyakupfundza kuti aona Yezu.

Camaulo, anyakupfundza awiri akhabuluka ku Yerusalemu kuenda ku Emawusi. Mu nseu, agumanikana na mamuna m’bodzi mbacita ulendo pabodzi pene. Buluka penepo, mamuna abvundza anyakupfundza: ‘Mbanji makani anacedza imwe?’ Iwo alonga: ‘Udzati kudziwa pidacitika? Mu ntsiku zitatu zidapita, akulu a anyantsembe apha Yezu. Cincino akazi anango asalonga kuti iye ali maso!’ Mamuna unoyu abvundza: ‘Nee  musakhulupira aprofeta? Iwo alonga kuti Kristu anadzaphiwa, buluka penepo mbalamuswa.’ Iye apitiriza kuapanga pya Malemba. Pidafika iwo ku Emawusi, anyakupfundza aphemba mamuna unoyu toera aende na iwo. Pa ndzidzi wakudya nkate, mamuna unoyu acita phembero. Natenepa iwo adzindikira kuti mamuna unoyu akhali Yezu. Pidadzindikira iwo, nee amuonabve.

Anyakupfundza awiri athamanga mbaenda n’nyumba ikhadagumanyikana apostolo mu Yerusalemu, mbaapanga pidacitika. Pikhali iwo mwenemu, Yezu aonekera pakati pawo. Pakutoma, apostolo nee akha- khulupira kuti akhali Yezu. Buluka penepo, iye alonga: ‘Yang’anani manja anga; ndiphateni. Pyalembwa kuti Kristu mbadalamuswa muli akufa.’