Yesuusi reyi gedensaanni, Yooseefi yinannihu mittu dureessu manchi Philaaxoosiwa mare reeshsha aannosi gede xaˈmiˈri. Hakkiinni Yooseefi reeshsha dancha seemmanni kafane haaro waamma giddo madaarino. Qoleno jawu kinchinni waammate afoo cufino. Kakkalaanote roorrooti Philaaxoosiwa marte togo yitu: ‘Yesuusi rosaano reeshshasi adhite isi reyotenni kaino yite dudubbara dandiitanno.’ Konni daafira Philaaxoosi ‘Waammate maattama gantine agarre’ yiinsa.

Sasu barri gedensaanni, soodo guto meentu waammanniwa maranno woyite kinchu gongoˈme hoˈle no. Sokkaanchu waammate giddo heeˈre meento togo yii: ‘Waajjitinoonte. Yesuusi reyotenni kaino. Hadhine rosaanosi Galiilaho isi ledo xaaddanno gede kullensa.’

Megidelitte Maariyaami, Pheexiroosinna Yohaannisi hassara dodanni hadhu. Hakkiinni insanni xaadduti, ‘Yesuusi reeshsha waammate giddonni fushshinohu no’ yitunsa. Pheexiroosinna Yohaannisi doddanni waammanniwa martu. Laˈanno woyite waammate giddo noori dino; konni daafira galagalte qaensa higgu.

Maariyaami galagalte waammanniwa martanno woyite, hakko noore lame sokkaasine laˈe insara togo yitu: “Mootichaˈya fushshite hiikka qoltinoro diafoomma.” Hakkiinni mitto mancho laˈu; hakku manchi gate towaaxxanni nooha laweennase, ‘Mooticha, hiikko woroottoro kulie ballo’ yitu. Ikkollana isi, “Maariyaami” yee woshshiseta, isi Yesuusa ikkinota affu. Ise wiˈlitanni “Rosiisaancho!” yite cuˈmite amaddusi. Hakkiinni Yesuusi Maariyaami, ‘Hadhe roduuwiˈyara ane laoottata kulinsa’ yiise. Hakkawoyintenni Maariyaami doddanni marte rosaanote Yesuusa laˈinota kultunsa.

Hakko barra, lame rosaano Yerusaalametenni Eemahusi yinanniwa hadhanni no. Hadhanni doogote heedheenna mittu manchi ledonsa haˈranni, ‘Maa hasaabbinanni heedhinoonni?’ yee xaˈminsa. Insano togo yite qoltu: ‘Sasu barri albaanni, kakkalaasinete roorrooti Yesuusa shitinota dimacciishshootto? Xa kayinni mitu meenti iso reyotenni kaino yaanni no!’ Manchu qole togo yiinsa: ‘Masaalaano coyidhinore  diammantinanni? Masaalaano “Kiristoosi reyanno; hakkiinni reyotenni kaˈˈanno” yitino.’ Isi Qullaawa Borro yitannore xawise kulinsa. Rosaano Eemahusi iilla rakkuti, hakkonne mancho ledo haˈno yitusi. Hurbaate ittara huuccatto assihu gedensaanni, Yesuusa ikkinota affu. Hakkiinni isi albinsanni goˈli.

Lamenti rosaano rakke Yerusaalame higge gamba yite noo soqqamaasinera ikkinore kultunsa. Hakkiinni insa mine heedheenna Yesuusi insa baalunkura leellinsa. Umo, soqqamaasine Yesuusa ikkinota diammantino. Hakkiinni isi togo yiinsa: ‘Kuneeti angaˈya laˈe; ane amammaddine laˈe. Kiristoosi reyotenni kaˈˈanno yine borreessinoonni.’