Ngesikhatsi Jesu sekafile, indvodza lebeyinjingile lebekutsiwa nguJosefa yacela kutsatsa sidvumbu saJesu lebesilenga elugodvweni. Josefa wase uyasitsatsa usigocotela ngendvwangu, usibeka ethuneni lelisha. Wavala lelithuna ngelitje lelikhulu. BaPhristi labakhulu batsi kuPilatu: ‘Siyesaba kutsi bafundzi bakhe kungenteka bafike bamebe bese batsi kubantfu uvusiwe ekufeni!’ Ngako Pilatu watsi kubo: ‘Tsatsani naba bogadzi kute bayewuligadza.’

Ngemuva kwemalanga lamatsatfu, ekuseni, labanye bomake bahamba baya kulelithuna futsi bafike batfola kutsi lelitje lebekuvalwe ngalo selikhweshile. Ingilosi lebeyisekhatsi ethuneni yatsi kulabomake: ‘Ningesabi. Jesu sewuvusiwe. Hambani niyewutjela bafundzi bakhe kutsi batamtfola eGalile.’

Mariya waseMagdala wagijima wayofuna Phetro naJohane. Wafike watsi kubo: ‘Kukhona lotsetse sidvumbu saJesu.’ BoPhetro naJohane bagijima baya ethuneni. Ngesikhatsi babona kutsi bekute sidvumbu ethuneni, babuyela emakhaya.

Mariya waphindze wabuyela ethuneni, watfola kunetingilosi letimbili, watsi kuto: ‘Angati kutsi sidvumbu seNkhosi yami basiyisephi.’ Wase ubona indvodza lacabanga kutsi nayo beyigadze lelithuna, watsi kuyo: ‘Mnumzane, ngicela ungitjele kutsi nimbekephi.’ Kodvwa lendvodza nayitsi kuye, “Mariya!” wase uyabona kutsi bekunguJesu. Wamemeta watsi: “Mfundzisi!” wase uyambamba. Jesu watsi kuye: ‘Hamba uyewutjela bafundzi bami kutsi sewungibonile.’ Mariya wagijima wayobatjela kutsi sewumbonile Jesu.

Ngalelo langa, bafundzi baJesu lababili nabasuka eJerusalema baya e-Emawusi, indvodza letsite yahambisana nabo yababuta kutsi bakhuluma ngani. Batsi kuyo: ‘Besewuvile yini? Kulamalanga lamatsatfu lengcile, baphristi labakhulu babulele Jesu. Kodvwa nyalo kunabomake labatsi Jesu sewuyaphila.’ Lendvodza yababuta yatsi: ‘Niyakukholwa yini lokwashiwo baphrofethi? Babiketela kutsi Khristu utawufa kodvwa  aphindze avuke.’ Wachubeka wabachazela loko lokushiwo yimiBhalo. Nabefika e-Emawusi, labafundzi bacela lendvodza kutsi ihambe nabo. Yatsi nayithantaza ngesikhatsi batewudla sinkhwa, base bayabona kutsi inguJesu. Yase iyanyamalala.

Ngekushesha labafundzi baya kubaphostoli eJerusalema bafike babatjela lokwentekile. Ngesikhatsi basehleti endlini, Jesu wefika. Labaphostoli bacale bangetsembi kutsi nguJesu. Ngako watsi kubo: ‘Bukani tandla tami, ngitsintseni. Kubhaliwe kutsi Khristu abetawuvuswa ekufeni.’