L’ɔkɔngɔ wa Yeso mvɔ, pami kɛmɔtshi k’ɔngɔnyi kakawelɛka Yɔsɛfu akalɔmbɛ Pilato dia nde mbɔsa odo wa Yeso oma l’otamba. Yɔsɛfu akɔmbɛ odo akɔ la dihɔndɔ dia linɛnɛ ndo akatɛ diangɔ di’epumu ko akadje odo akɔ lo diombo di’oyoyo. Nde akangitola dive dia wotsho la soko dia diombo. Owandji w’ɛlɔmbɛdi akatɛ Pilato ate: ‘Sho tekɔ la wɔma nɛ dia ambeki wa Yeso amɔtshi mbeyaka ndjɔsa odo ande ko ndjota ɔnɛ nde akolwe.’ Ɔnkɔnɛ Pilato akawatɛ ate: ‘Nyodihe diombo ndo nyodilamake.’

L’ɔkɔngɔ wa nshi shato, la pindju ka pɛɛ, wamato amɔtshi wakatshu otsha la diombo ko wakatotana dive diakangitwe. L’etei ka diombo, ondjelo akatɛ wamato akɔ ate: ‘Tanyokake wɔma. Yeso akashidi la mbolɔ. Nyotshu ndo nyotote ambeki ande dia vɔ tohomana la nde la Ngalileya.’

Mariya w’ose Mangadala akalawɔ otsha le Petero nde la Joani. Nde akawatɛ ate: ‘Onto ɔmɔtshi akɔshi odo wa Yeso!’ Petero nde la Joani wakalawɔ otsha la diombo. Lam’akawɛnyi dia diombo diaya hwe, vɔ wakakalola lawakawɔ.

Etena kakakalola Mariya otsha lo diombo, nde akɛnyi andjelo ahende l’etei ndo nde akawatɛ ate: ‘Dimi haleye lɛnɛ akawatshwe la nkumɛmi.’ Oma laasɔ, nde akɛnyi onto ɔmɔtshi ndo akafɔnya dia nde aki olami, ko nde akawotɛ ate: ‘Yɔnɛ, lam’alangayɛ ombutɛ lɛnɛ akayawɔtɔdi.’ Koko lam’akate pami kakɔ ate: “Mariya!” nde akeye dia nde ekɔ Yeso. Mariya akate la dui dia wolo ate: “Ombetsha!” Ko nde akookimɛ. Yeso akawotɛ ate: ‘Tshɔka tote analengo dia wɛ akamɛnyi.’ Ko Mariya akalawɔ otsha le ambeki ndo akatowatɛ dia nde akɛnyi Yeso.

Yema l’ɔkɔngɔ ko lushi lakɔ, ambeki ahende wakatatshɔka oma la Jɛrusalɛma otsha la Emayo. Pami kɛmɔtshi akasambe la wɔ mboka ndo akawambola kɛnɛ kakawatatɛkɛtaka. Vɔ wakawotɛ vate: ‘Onde wɛ atoke? Ambeta nshi shato, yambodiaka ewandji w’ɛlɔmbɛdi Yeso. Wonya ɔnɛ, wamato amɔtshi wekɔ lo mbuta dia nde ambolɔ!’ Pami kakɔ akawambola ate: ‘Onde hanyetawɔ  amvutshi? Vɔ wakate dia Kristo akahombe mvɔ ko oma laasɔ nde mbolɔ.’ Ko nde akatetemala mbalembetshiya Afundelo. Lam’akawakome la Emayo, ambeki wakalɔmbɛ pami kakɔ dia nde ntshɔ la wɔ. L’ɔkɔngɔ wa nde nsala dɔmbɛlɔ dia yangɔ ya ndɛ ya la dikɔlɔ, vɔ wakashihodia dia nde aki Yeso. Oma laasɔ, nde akashishɔ.

Ambeki ahende asɔ wakasamanya otsha lo luudu la la Jɛrusalɛma lɛnɛ akasangana apɔstɔlɔ ndo wakatowatɛ kɛnɛ kakatombe. Lam’akiwɔ lɛkɔ, l’etei ka luudu, Yeso akɛnama le wɔ vɔ tshɛ. L’etatelo, apɔstɔlɔ kokoka mbetawɔ dia nde aki Yeso. Ko nde akawatɛ ate: ‘Nyende anya ami; nyominande. Akafundama dia Kristo ayolɔ oma lo nyɔi.’