Yesu wati wafwa pa chimiti, kunguza munthu munyaki yo wenga wakukhupuka zina laki Yosefi. Iyu wangupempha Pilato kuti wamuzomerezi kuto liŵavu laku Yesu. Yosefi wangukulunga ‘liŵavu lo musalu zamampha ndi kulipaka vakununkhilisiya ndipu wanguchiliŵika mumuwunda wufya. Iyu wangujalapu chimwa chikulu pa nkhomu lamuwunda. Ŵara ŵa asembi angukambiya Pilato kuti: “Tiwopa kuti anyaki mwa akusambira aku Yesu angazito liŵavu laki ndi kukamba kuti wayuka.’ Mwaviyo, Pilato wanguti: ‘Mukajalepu ukongwa pa muwunda ndipu mukalondiyengi.’

Pati pajumpha mazuŵa ngatatu, anthukazi anyaki angucherere ku masanu ndipu angusaniya kuti chimwa chatuzgikapu pa khomu la muwunda. Mukati mwa muwunda wo, mwenga mungelu ndipu wangukambiya anthukazi wo kuti: ‘Kopa cha. Yesu wayuskika. Lutani mukakambiyi akusambira ŵaki kuti akakumani nayu ku Galileya.’

Mariya Magadala wangutchimbiya kuchikambiya Petro ndi Yohane. Iyu wanguŵakambiya kuti: ‘Munthu munyaki waba liŵavu laku Yesu!’ Petro ndi Yohane angutchimbiriya kumuwunda. Ŵati asaniya kuti mumuwunda mulivi kanthu, anguwere kunyumba zawu.

Mariya wati waluta so kumuwunda, wanguwona angelu ŵaŵi mukati mwa muwunda ndipu wanguŵakambiya kuti: ‘Ndiziŵa cha ko aluta nawu Ambuya.’ Pavuli paki, wanguwona munthurumi ndipu waŵanaŵananga kuti ngwakuphwere munda ndipu wanguti: ‘Ada, chondi ndikambiyeni ko mwamuŵika.’ Kweni munthu yo wati wadana kuti, “Mariya!” wanguziŵa kuti wenga Yesu. Iyu wangudaniriza kuti: ‘Musambizi!’ ndipu wangumuvumbatiya. Yesu wangumukambiya kuti: ‘Luta, kakambiyi abali ŵangu kuti wandiwona.’ Nyengu yeniyo, Mariya wangutchimbiriya kwa akusambira ndi kuŵakambiya kuti wawona Yesu.

Mazulu nga zuŵa lenili akusambira ŵaŵi atuwanga ku Yerusalemu akanga ku Emawusi. Yiwu angukumana ndi munthu munyaki yo wangwamba kulongozgana nawu ndipu wanguŵafumba vo akambisananga. Yiwu angumuka kuti: ‘Kumbi wavwa cha? Mazuŵa ngatatu ngo ngaluta, ŵara ŵa asembi akubaya Yesu. Sonu anthukazi anyaki akamba kuti wayuka!’ Munthu yo wangufumba kuti: ‘Kumbi mutiŵagomeza cha achimi? Yiwu anguti Khristu wazamukufwa ndipu pavuli paki wazamuyuskika.’ Iyu wangulutiriza  kuŵakonkhose Malemba. Ŵati afika ku Emawusi, akusambira wo angupempha munthu yo kuti aluti limoza ko akanga. Pa nyengu ya chakurya chamazulu, munthu yo wangupemphere chakurya cho akhumbanga kurya ndipu wati wamala anguziŵa kuti wenga Yesu. Pavuli paki, wanguwoneka so cha.

Akusambira ŵaŵi yaŵa angwenda mwaliŵi kuluta ku Yerusalemu ko anguwungana akutumika ndipu anguŵakambiya vo vinguchitika. Po ŵenga munyumba yeniyo, Yesu wanguwoneke kwaku wosi. Pakwamba akutumika angugomeza cha kuti wenga Yesu. Iyu wanguti: ‘Wonani manja ngangu, ndikoni. Malemba ngakukamba kuti Khristu wazamuyuskika.’