Hwane nyo ba Jesu a fude, mwama nyo khaguri nyo ghanye nyo pwani khu Josefa a di lomba Pilato gu khuye a mu dzumeleya gu tshisa girumbi gya Jesu vbasimbotunu. Josefa a di fumbeya girumbi khu dzitshalu nyo age, a gi thedzeya mafura nyo nungeye, khavbovbo a ya gi dzinga omu nya semiteryo nya yiphya. A di wumbuluseya giwindri nyo lemeye a sega khigyo vbamwanya nya lithowo. Vapristi nya vakhongolo va di embeya Pilato, khavo: ‘Hi ngu thava gu khethu vapizane va Jesu va ta dzega girumbi gyaye va vbedza va khavo a di wuga.’ Khu kharato, Pilato a di va embeya, khuye: ‘Segani lithowo li tiya mu bwe mu vega muthu gasi a li ghadha.’

Hwane nyo ba gu vbindride matshigu mararu, vanyamayi va di hongola thowoni ni dzimindru. Va di ya mana gu giwindri gi nga ba gi segide mwanya nya lithowo gi dusidwe. Ndrani nya lithowo, gu diri ni ngilozi. Ngilozi yi di embeya vanyamayi vale, khiyo: ‘Mu nga thavi. Jesu wusidwe. Gimbiyani mu ya embeya vapizane vaye gu khenu va na ya mu mana Galileya.’

Khavbovbo, Mariya Madhalena a di vbiredza a ya vbwetedzeya Pedro ni Johane. A va embeya khuye: ‘Womo a nga dzega girumbi gya Jesu!’ Pedro ni Johane va di tutuma va hongola thowoni. Tepo va nga vboha, kha va mana muthu thowoni; va di bweleya magaya gwawe.

Tepo Mariya a nga bweleya thowoni, a di wona dzingilozi dzimbili ndrani nya lithowo, a dzi embeya khuye: ‘Kha nyi dziti gu kheni va yi yiside hayi pfhumu yangu.’ A di wona mwama nyo khaguri, a pimisa gu khuye khu wule nyo ghadhe lithowo, khavbovbo khuye: ‘Ama baba, nga nyi embeya omu u nga mu vega umo.’ Ganiolu, tepo mwama yoyo a nga khuye: ‘Mariya!’ A di dzegeya gu tugula gu khuye khu Jesu. Mariya khuye: ‘Muhevbudzi!’ khavbovbo a mu barasari. Jesu khuye: ‘Gimbiya u ya embeya vandriyangu gu khuwe u nyi wonide.’ Mariya a di dzegeya gu tutuma a hongola ga vapizane a ya va embeya khuye wonide Jesu.

Ni siyambo sakona, vapizane va Jesu va di manana ni mwama nyo khaguri ndziyani na vata khu Jerusalema va hongola Emawusi. Mwama yoyo a di longoloka navo, khavbovbo a va wudzisa gu khuye va di gu bhula khu ginani. Va di mu hlamula khavo: ‘Kha wu dziti gu khuwe ga matshigu mararu ma nga vbindra, vapristi nya vakhongolo va songide Jesu? Olu vanyamayi nyo khaguri vari khavo Jesu a ngu vbanya!’ Mwama yoyo a di wudzisa khuye: ‘Kha mu khodwi esi si nga ganedwa khu vaprofeti? Vaprofeti va di  khavo Kristo a di hadzi songwa a bwe a wuswa khu ga vafudego.’ Mwama yoyo a di simama gu tshamuseya Milowo. Tepo va nga vboha Emawusi, vapizane va di lomba mwama yoyo gu khavo a beya navo. Tepo a nga gombeleya pawu gasi va hodza, va di dzegeya gu si tugula gu khavo gu diri Jesu. Khavbovbo, Jesu a di mwalalega.

Vapizane vovo nya vavili va di vbiredza va hongola Jerusalema omu vapostoli va nga ba va tshanganide umo, va ya va embeya esi si nga dugeleya. Na va ngari vatshavbo nyumbani mule, Jesu a di wonega ga vatshavbo. Vapostoli kha va dzegeya gu khodwa gu khavo gu diri uye Jesu. Jesu a di va embeya, khuye: ‘Khedzani mandza yangu, kha mu ma woni aya. Gu lovidwe gu pwani Kristo a di hadzi wuga khu ga vafudego.’