Jesu naakafwa, umwi mwaalumi wakanotede wakali kutegwa Josefa, wakakumbila Pilato kuti amuzumizye kwangula chidumbu chaJesu achisamu. Josefa wakaputila chidumbu chaJesu amulembo mubotu alimwi wakachinanika mafuta akuchibikka mukabanda kapya. Wakalayilila kuti kabanda kajalwe abbwe pati. Bapayizi bapati bakabuzya Pilato kuti: ‘Tuliyoowede kuti bamwi basikwiiya baJesu balakonzya kubba chidumbu chakwe akwaamba kuti wabuka kubafu.’ Nkinkaako, Pilato wakati: ‘Amukajalisye kabanda akubikka balindi.’

Nikwakiinda mazuba atatu, kuseni bamwi banakazi bakiinka kukabanda akujana bbwe kalili lyagwisigwa. Bakajana mungelo mukabanda mpawo wakababuzya kuti: ‘Mutayoowi. Jesu wabusigwa. Amwiinke mukabuzye basikwiiya bakwe kuti bakaswaanane aawe kuGalilaya.’

Mariya Magadalene wakachijaana kuyooyanduula Petro aJohane. Wakababuzya kuti: ‘Kuli muntu wabweza chidumbu chaJesu!’ Petro aJohane bakachijaana kabaya kukabanda. Nibakajana kakutakwe muntu mukabanda, bakabweeda kumyuunzi yabo.

Mariya naakabweeda kukabanda, wakajana bangelo babili mukati, mpawo wakababuzya kuti: ‘Tandizi kuti Mwaami bamutola kuli.’ Mpawo wakabona umwi mwaalumi pesi wakayeeya kuti ngusikulima muunda, nkinkaako wakati: ‘Inche ndibuzye nkwamutola.’ Pesi chiindi mwaalumi ooyo naakamwiita azina kati: “Mariya,” wakaziba kuti nguJesu. Mariya wakati: ‘Muyiisi,’ mpawo wakachijaana kaya kulinguwe. Jesu wakamubuzya kuti: ‘Koya ukabuzye bakwesu kuti wandibona.’ Chakufwambaana, Mariya wakachijaana kaya kuli basikwiiya akubabuzya kuti wabona Jesu.

Sikati, basikwiiya babili baJesu bakali kweenda kabazwa kuJerusalemu kabaya kuEmawu. Umwi mwaalumi wakeendaamwi ambabo akubabuzya nzibakali kuzuwa. Bakati: ‘Tuzimvwide na zyakachitika? Bapayizi bapati bakapa kuti Jesu ajayigwe mumazuba atatu akayinda. Lino bamwi bakayintu balikuti wakabusigwa.’  Mwaalumi ooyo wakababuzya kuti: ‘Tamubasyomi na basinsimi bakaamba kuti Kristu wakali kuyoofwa akubusigwa?’ Mpawo wakabapandulwida magwalo. Nibakasika kuEmawu, basikwiiya bakakumbila kuti mwaalumi ooyo akakkale ambabo. Naakamana kukombela chinkwa chakali kuyoolyigwa goko bakaziba kuti nguJesu. Mpawo wakabulika.

Basikwiiya bakwe babili bakachijaana kabaya kuJerusalemu kwakabungene baapostolo akubabuzya zyoonse zyakachitikide. Nibakali mung’anda eeyo, Jesu wakalibonia kuli mbabo. Kumasaangunino, baapostolo teebakasyoma pe kuti wakali Jesu. Pesi Jesu wakati: ‘Amujate maboko aangu. Kwakalembwa kuti Kristu uyoobusigwa kuzwa kubafu.’