Taim Jisas i dai, wanpela maniman nem bilong Josep, i askim Pailat long larim em i kisim bodi bilong Jisas long pos i kam daun. Josep i karamapim bodi long gutpela laplap linen na putim ol spais na putim bodi long nupela matmat ston. Em i rolim traipela ston long karamapim ai bilong matmat. Ol bikpris i tokim Pailat: ‘Mipela i pret nogut sampela disaipel bilong Jisas bai kisim bodi bilong em na tok olsem em i kirap bek.’ So Pailat i tokim ol: ‘Pasim matmat strong na putim ol gad long was.’

Tripela de bihain, long bikmoning tru, sampela meri i go long matmat na ol i lukim olsem wanpela i bin rolim ston long ai bilong matmat i go. Insait long matmat, wanpela ensel i tokim ol meri: ‘Yupela i no ken pret. Jisas i kirap bek pinis. Go na tokim ol disaipel bilong em long bungim em long Galili.’

Maria Makdala i hariap i go painim Pita na Jon. Em i tokim ol: ‘Wanpela i kisim bodi bilong Jisas i go!’ Pita na Jon i ran i go bek long matmat. Taim ol i lukim olsem no gat bodi long matmat, ol i go bek long ol haus bilong ol.

Taim Maria i go bek long matmat, em i lukim tupela ensel insait long matmat na em i tok: ‘Mi no save ol i kisim Bikman bilong mi i go we.’ Nau em i lukim wanpela man, na em i ting dispela man i lukautim gaden, so em i tok: ‘Bikman, plis tokim mi yu putim em long wanem hap.’ Tasol taim dispela man i tok, “Maria!” em i save em Jisas tasol. Maria i tok: “Tisa!” na em i holim Jisas. Jisas i tokim em: ‘Go na tokim ol brata bilong mi olsem yu lukim mi.’ Wantu, Maria i ran i go long ol disaipel na tokim ol olsem em i bin lukim Jisas.

Long dispela de yet, tupela disaipel i wokabaut lusim Jerusalem na i go long Emeus. Na wanpela man i joinim ol long rot na askim ol long samting ol i toktok long en. Ol i tok: ‘Yu no bin harim? Tripela de i go pinis, ol bikpris i kilim i dai Jisas. Na nau sampela meri i tok Jisas i stap laip!’ Dispela man i askim: ‘Yupela i bilipim ol profet? Ol i tok Krais bai dai na bihain em bai kirap bek.’ Dispela  man i wok long eksplenim ol Rait Holi long ol. Taim ol i kamap long Emeus, ol disaipel i tokim dispela man long go wantaim ol. Long taim bilong kaikai long apinun, bihain long em i beten long bret, nau ol i luksave em Jisas tasol. Na em i lus nating.

Dispela tupela disaipel i hariap i go long haus long Jerusalem we ol aposel i bung i stap na tokim ol long samting i bin kamap. Taim ol i stap long hap, insait long haus, Jisas i kamap long olgeta yet. Pastaim, ol aposel i no bilip olsem em Jisas. Bihain em i tok: ‘Lukim han bilong mi; holim mi. Rait Holi i tok olsem Krais bai dai na kirap bek.’