Иисус чок апаарга, Иосиф деп бир бай кижи ооң мага-бодун чагыдан дүжүрүп алыр чөпшээрелди Пилаттан ап алган. Иосиф Иисустуң мага-бодун эки шынарлыг лён пөс-биле ораагаш, чаагай чыттыг үстер-биле чаггаш, хаяда чаа чевег-куйга орнукшудуп каан. Ол чевег-куйну улуг даш-биле дуглап кааш турган. Өргээниң улуг бараалгакчылары Пилатка: «Иисустуң өөреникчилери ооң мага-бодун алгаш, катап дирлип келди дээринден коргуп тур бис» — деп чугаалааннар. Ынчан Пилат: «Чевег-куйга таңмадан баскаш, таңныылдардан тургузуп калыңар» — деп дужааган.

Иисустуң чок апарганындан бээр үш хонук эрткенде, даң бажында каш херээжен кижи чевег-куйга кээрге, ооң аксы ажык болган. Ооң иштинде ангел олурган. Ол: «Кортпаңар, Иисус дирлип келген. Галилеяже баргаш, ооң-биле ужуражыр кылдыр ооң өөреникчилеринге дамчыдыңар» — дээн.

Пётр биле Иоанны дилээр дээш, Мария Магдалина халып чорупкан. Ол оларга: «Иисустуң мага-бодун бир кижи аппарган-дыр!» — дээн. Пётр биле Иоанн дүвү-далаш чевег-куйга халчып кээрге, кым-даа чок боорга, чорупканнар.

Мария чевег-куй иштинде ийи ангелди көрүп кааш: «Дээргимни кайнаар аппарганын билбес-тир мен» — деп чугаалаан. Ынчан база бир эр кижини Мария эскерип каан. Ону сесерлик ажаакчызы деп бодааш: «Дээрги, Иисустуң мага-бодун кайнаар аппардыңар, чугаалап бериңерем» — деп айтырган. Ол: «Мария!» — дептерге, ону Иисус деп танып кааш: «Башкы!» — деп, Мария алгырыпкаш, куспактапкан. Иисус аңаа: «Мени көргениңни акыларга чугаала» — дээн. Мария ол-ла дораан халып чорупкаш, Иисусту көргенин ооң өөреникчилеринге чугаалаан.

Ол-ла хүн ийи өөреникчи Иерусалимден Эммаусче бар чыткан. Орук ара оларга бир кижи таваржып келгеш, оларның чүнү чугаалажып турарын сонуургаан. Өөреникчилер аңаа: «Дыңнавадыңар бе, үш хүн бурунгаар өргээниң улуг бараалгакчылары Иисусту өлүрүп кагды. Ам чамдык херээжен улус ону катап дирлип келген дижип турар-дыр» —  дээн. Ол кижи айтырган: «Силер медээчилерге бүзүревес-тир силер бе? Олар Христос өлгеш, катап дирлип кээр деп бижээн болгай». Оон ол Библиядан аңгы-аңгы өттүр билген медеглелдерни оларга тайылбырлап эгелээн. Эммауска чедип келгеш, олар ону кады артып каарын дилээн. Кежээки чем үезинде ол кижи хлебти алгаш, мөргүптерге, олар ону Иисус деп танып каан. Ынчалза-даа ол көзүлбейн барган.

Өөреникчилер чүү болганын элчиннерге чугаалаар дээш дедир Иерусалимче чорупкан. Оларның турган бажыңынга Иисус чедип келген. Баштай элчиннер бүзүревээннер. Ынчан Иисус: «Мээң холдарымны көрүп, меңээ дээп көрүңер даан. Баш удур медеглээни дег, Христос өлгеш, дирлип келген» — деп чугаалаан.