Noke yolofa via Yesu, ulume umue ohuasi o tukuiwa hati Yosefe, wa pinga ku Pilato oco o wecelele okupa etimba lia Yesu kuti wekangiso. Yosefe wa muña etimba ponanga yovalatanya, wo sieketa amẽla velemba liwa kuenda wo langeka veyambo limue liokaliye. Eye wa tiñuluila ewe limue li lema puvelo weyambo. Ovitunda via velapo via sapuila Pilato viti: ‘Tu kasi lusumba wokuti olondonge vimue via Yesu vi kopa etimba liaye kuenje vi popia viti, wa pinduiwa kuava va fa.’ Omo liaco, Pilato wa va sapuila hati: ‘Sitiki kuenda lavi eyambo liaco.’

Noke yoloneke vitatu, komẽle ociteketeke, akãi vamue va enda keyambo kuenje va sanga okuti ewe liopiwako. Vokati keyambo ungelo umue wa sapuila akãi hati: ‘Ko ka kuati usumba. Yesu wa pinduiwa. Kuendi ka sapuili olondonge viaye oco va lisange laye ko Galilea.’

Maria Magadala wa enda lonjanga oco a ka lisange la Tiago kuenda Yoano. Eye wa va sapuila hati: ‘Omunu umue wopa etimba lia Yesu!’ Petulu la Yoano va lupukila keyambo. Eci va mola okuti veyambo ka muli cimue, va tiukila kolonjo viavo.

Eci Maria a tiukila keyambo wa mola ovangelo vavali va kala vokati keyambo kuenje wa va sapuila hati: ‘Sia kũlĩhĩle apa va langeka Ñala yange.’ Noke wa mola ulume umue kuenda wa sima okuti ukuacumbo kuenje wo sapuila hati: ‘A ñala, sapuileko apa wo kapa.’ Pole, eci ulume a popia hati: “A Maria!” eye wa limbuka okuti Yesu. Eye wa kaluka hati: “Olongisi!” kuenje wo kuata. Yesu wo sapuila hati: ‘Kuende ka sapuile vamanjange okuti ove wa ndi mola.’ Vepuluvi liaco, Maria wa lupukila kolondonge kuenje wa va sapuila okuti wa mola Yesu.

Eci ekumbi lia iñila, olondonge vivali via kala oku tunda ko Yerusalãi oku enda ko Emausi. Ulume umue wa likongela kokuavo vetapalo kuenda wa va pula eci ovo va kala oku sapela. Ovo va tambulula vati: ‘Kua ci yevele? Papita ale oloneke vitatu tunde eci ovitunda via velapo via ponda Yesu. Cilo akãi vamue va kasi oku popia okuti, eye o kasi lomuenyo!’ Ulume wa pula hati: ‘Ene ka vu tava kovaprofeto?  Ovo va popia okuti Kristu wa laikele oku fa kuenje noke o pinduiwa.’ Eye wamamako oku va lomboluila Ovisonehua. Eci va pitĩla ko Emausi, olondonge via pinga kulume waco oco a kale lavo. Kondalelo noke yoku likutilila catiamẽla kombolo, va limbuka okuti ulume waco Yesu. Noke wa takata pokati kavo.

Olondonge viaco vivali, via enda lonjanga konjo ko Yerusalãi kuna ovapostolo va liongoluila kuenje va va sapuila ovina via pita. Osimbu va kala vonjo, Yesu wa molẽha pokati kavo. Tete ovapostolo ka va tavele okuti ulume waco wa kala Yesu. Omo liaco, Yesu wa popia hati: ‘Tali ovaka ange; ndi lambi. Ca sonehiwa okuti Kristu wa laikele oku pinduiwa kolofa.’