Kamatay ni Jesus, naghangyo kan Pilato an riko nga hi Jose nga iya kukuhaon an lawas ni Jesus tikang ha kahoy. Iya ginputos an lawas ni Jesus hin maopay nga klase hin tela nga may mga pahamot ngan iginbutang ha bag-o nga lubnganan. Iya ginsadhan hin mabug-at nga bato an lubnganan. An punoan nga mga saserdote nagsiring kan Pilato: ‘Nababaraka kami nga kuhaon han pipira nga disipulo ni Jesus an iya lawas ngan sumiring nga nabanhaw hiya.’ Salit ginsidngan hira ni Pilato: ‘Sadhi hin maopay an lubnganan ngan pabantayi.’

Paglabay hin tulo ka adlaw, may mga babaye nga kinadto ha lubnganan ha kaagahon. Nakita nira nga ginkuha na an bato ha ganggang han lubnganan. Ha sulod han lubnganan, usa nga anghel an nagsiring ha mga babaye: ‘Ayaw kamo kahadlok. Ginbanhaw na hi Jesus. Kadto kamo ha iya mga disipulo ngan sidnga hira nga makigkita ha iya ha Galilea.’

Nagdagmit hi Maria Magdalena pagkadto kanda Pedro ngan Juan. Ginsidngan niya hira: ‘May nagkuha han lawas ni Jesus!’ Dinalagan hira Pedro ngan Juan pakadto ha lubnganan. Han nakita nira nga waray na ito sulod, nanguli hira.

Pagbalik ni Maria ha lubnganan, nakakita hiya hin duha nga anghel ha sulod hito, ngan iya hira ginsidngan: ‘Diri ako maaram kon diin nira gindara an akon Ginoo.’ Tapos, nakakita hiya hin lalaki. Kahuna niya nga an hardinero ito, salit nagsiring hiya: ‘Mano, sumati ako kon diin mo hiya gindara.’ Pero han nagsiring an lalaki, “Maria!” nakilal-an niya nga hi Jesus ito. Nagsiring hiya: “Magturutdo!” ngan ginkaptan niya hi Jesus. Ginsidngan hiya ni Jesus: ‘Kadtoa an akon kabugtoan ngan sidnga nga nakita mo ako.’ Dinalagan dayon hi Maria pakadto ha mga disipulo ngan ginsumatan hira nga nakita niya hi Jesus.

Hito gihap nga adlaw, duha nga disipulo an nagbabaktas tikang ha Jerusalem tipakadto ha Emaus. Dinaop ha ira an usa nga lalaki ngan nagpakiana kon ano an ira gin-iistoryahan. Hira nagsiring: ‘Diri ka ba maaram? Tulo ka adlaw na an naglabay, iginpapatay hi Jesus han punoan nga mga saserdote. Yana, may pipira nga kababayin-an nga nasiring nga buhi hiya!’ An lalaki nagpakiana: ‘Diri ba kamo natoo ha mga propeta?  Nagsiring hira nga mamamatay an Kristo, tapos babanhawon hiya.’ Padayon nga iginsaysay niya ha ira an Kasuratan. Pag-abot nira ha Emaus, ginsidngan hiya han mga disipulo nga umupod ha ira. Kahuman niya mag-ampo para ha tinapay ha ira pangiklop, nakilal-an nira nga hiya hi Jesus. Tapos, nawara hiya.

An duha nga disipulo nagdagmit pagbalik ha Jerusalem. Kumadto hira ha balay diin nagkakatirok an mga apostol ngan iginsumat an nahitabo. Didto, nagpakita hi Jesus ha ira ngatanan. Ha siyahan, diri makatoo an mga apostol nga hiya hi Jesus. Salit hiya nagsiring: ‘Kitaa an akon mga kamot; kapti ako. Nahisurat nga an Kristo mababanhaw.’