Yesu ali awile, mundu jwine jwakusicila jwakolanjidwa Yosefe ŵam’ŵendile Pilato kuti akatyosye mtembo wa Yesu pacitela pala. Yosefe ŵawuŵijilile mtembo wa Yesu ni nguwo syambone soni ŵawutasile yindu yakununjila. Kaneko jwalakwe ŵawusicile mtembowo m’malembe. Jwalakwe ŵawugele pamlango wa lilembelyo ni liganga lyekulungwa. Acakulungwa ŵambopesi ŵamsalile Pilato kuti, ‘Tukogopa kuti ŵakulijiganya ŵane ŵa Yesu cacijigala mtembo wa Yesu ni kusalaga kuti jwalakwe ajimwice ku ŵawe.’ M’yoyo Pilato ŵasalile jemanjajo kuti, ‘Akamate liganga lyalili pamlangopo ni akalondeleje.’

Palisiku lyatatu kundaŵi, acakongwe ŵane ŵajawile kulilembe kula, nambo ŵalisimene liganga lila lili lyetyosye. Ndaŵi jijojo, jumo jwa acakongwewo juŵaliji Maliya Magadalena jwawutwice kukumsosa Petulo ni Yohane. Nambo acakongwe ŵanewo ŵajinjile mkati mwa lilembemo, ni lilayika lyasalile kuti, ‘Mkajogopa. Yesu ajimwice ku ŵawe. Mjawule mkasalile ŵakulijiganya ŵakwe kuti akasimane najo ku Galileya.’

Maliya Magadalena ali amsimene Petulo ni Yohane ŵasalile kuti, ‘Mundu jwine ajigele mtembo wa Yesu.’ M’yoyo Petulo ni Yohane ŵawutucile kulilembe lila. Ali ayiweni kuti mwaliji mwangali cilicose, ŵawujile kumangwawo.

Maliya jula paŵawujile kulilembe kula, ŵagaweni malayika gaŵili gali mkati mwa lilembelyo ni ŵagasalile kuti, ‘Ngangumanyilila kuti Ambuje ŵangu ŵaŵisile kwapi.’ Kaneko jwalakwe ŵam’weni jwamlume ni ŵaganisyaga kuti ali jwakulima mumgunda, ni ŵam’wusisye kuti, ‘Baba, conde asalile kwaŵisile mtembo wa Ambuje.’ Nambo jwamlumejo paŵagambile kuti, “Maliya!” jwalakwe jwamanyilile kuti munduju jwaliji Yesu. Kaneko jwalakwe jwagumisile kuti, “Mwalimu!” ni ŵamkumbatile. Yesu ŵamsalile Maliyajo kuti, ‘Mjawule mkasalile acabale ŵangu kuti mumbweni.’ Ndaŵi jijojo, Maliya ŵawutucile kwa ŵakulijiganya ŵala kukwasalila kuti am’weni Yesu.

Lisiku lilyolyo, ŵakulijiganya ŵaŵili ŵa Yesu ŵatyocelaga ku Yelusalemu kwawula ku Emawo. Jemanjaji paŵaliji paulendowu, ŵasimene ni mundu jwine ni ŵajendaga najo yalumo. Kaneko mundu jula ŵawusisye jemanjajo yaŵatagulilanaga. Ni jemanjajo ŵatite, ‘Ana nganimpikana? Masiku gatatu gapitega acakulungwa ŵambopesi ŵam’wuleje Yesu. Nambo sambano acakongwe ŵane akusala kuti jwalakwe ali cijumi.’ Kaneko mundu jula  ŵawusisye ŵakulijiganyawo kuti, ‘Ana jemanja ngamkusakulupilila ŵakulocesya? Ŵakulocesya ŵasasile kuti Klistu caciwa kaneko cacijimuka ku ŵawe.’ Mundujo ŵajendelecele kwatagulila Malemba ŵakulijiganyawo. Ali ayice ku Emawo, ŵakulijiganya ŵala ŵam’ŵendile mundu jula kuti aŵe najo yalumo. Pandaŵi ja cakulya ca musi, mundu jula jwapelece lipopelo lya cakulyaco. Kaneko ŵakulijiganya ŵala ŵayimanyi kuti munduju ŵaliji Yesu. Kaneko jwalakwe nganawonekasoni.

Ŵakulijiganya ŵala ŵawutucile ku Yelusalemu kuŵasongene ŵandumetume ni ŵasalile yayatendekweyo. Paŵaliji m’nyumba ku Yelusalemuko, Yesu ŵawonecele kwa wosopewo. Pandanda, ŵandumetumewo nganakulupilila kuti ali Yesu. Kaneko jwalakwe ŵasalile kuti, ‘Alole magasa ganguga, angwaye. Yalembedwe kuti Klistu cacijimuka ku ŵawe.’