Bo Yesu kafwa, dibakala dimweka diba busina baba tanguninanga Zozefi wudinda nyitu yi Yesu kwidi Pilatu mwingi katula ku dibumba. Nandi wuzinga nyitu yi Yesu beni va dilensola di thalu ayi wuvinda yawu malasi ma thalu. Bosi wutula nyitu yi Yesu va dibumbi dimona ayi wutula va mwelo dimanya dinneni. Zinganga zi Nzambi zi bakhulutu bayenda kamba Pilatu: ‘A mfumu, boma twidi, kibila wumweka mu bapostolo kalenda kwenda ti ku dibumba, kukwiba nyitu yi Yesu mwingi kavuna batu ti nandi bevulubuka.’ Pilatu wuba kamba: ‘Tulanu kuna masodi mwingi bakengidila dibumbi beni.’

Bo va vyoka bilumbu bitatu, va meni meni, Malia Madaleni ayi bakyeto bankaka bayenda ti ku dubumbi bazikila Yesu ayi babata diawu dizibuka. Ku khati dibumbi beni, babata mbasi wuba kamba: ‘Bikanu kumona boma! Yesu bevulubuka. Yendanu ayi mukamba minlandikini myandi benda ku Ngalili mwingi badengana.’

Malia Madaleni wuduma zithinu mwingi kuzabikisa Petelo ayi Yoane mambu bamonikina. Nandi wuba kamba: ‘Mutu bekwiba nyitu yi Yesu!’ Petelo ayi Yoane bayenda mu thinu ti ku dibumbi. Bo bamona ti ni mutu kwisa ba ko, bavutuka mu zinzo zyawu.

Vayi Malia wuvutuka ku dibumbi. Mu nzila nandi wudengana zimbasi wadi ayi wuba kamba: ‘Minu yisinzaba ko vawu batudidi nyitu yi Mfumu’ami!’ Bosi wubwe mona vana dibakala dinkaka wuba buka nkebi wu biteka. Malia wunyuvula: ‘Lemvuka tata, khamba kwidi betula nyitu yi Mfumu Yesu? Bo dibakala beni kantela “Malia!” Malia wuvisa ti Yesu wuba koluka yandi. Nandi wutambudila mu nyenzi ayi wuyituka: “Nlongisi!” Yesu wunkamba: ‘Yenda ayi kamba zikhomba zyami ti ngye mambona.’ Malia wuduma zithinu mwingi kazabikisa minlandikini ti nandi wumona Yesu.

Kilumbu kilanda, minlandikini myodi bo baba kwenda ku divula baba tanguninanga Emawusi, dibakala dimweka wutona kudyata yawu ayi wuba yuvula mambu mbi baba koluka. Bawu batuba: ‘Ngye sa kuwa ko mambu mavyokidi? Bilumbu bitatu bima vyoka kumbusa, zinganga zi nzambi batumini kavonda Yesu. Buabu nkyeto wumweka kantubila ti Yesu mavulubuka, nandi wummweni. Dibakala beni wuba yuvula: ‘Beno muntelanga mana mu zimbikudulu zi Kibibila? Zyawu zituba ti Yesu  wala fwa ayi wala vulubuka.’ Nandi wubwela kuba sudikisa Dyambu di Nzambi. Bo batula ku Emawusi, minlongisi badinda dibakala beni kakala yawu. Va masika ma bwilu, mu thangu dibakala beni kamana kuvanga nsambu mwingi badya, minlandikini bavisa ti nandi Yesu. Muna thangu beni wiza zimbala.

Bosi minlandikini beni mi myodi baduma zithinu ti ku Yelusalemi mwingi kuzabikisa bapostolo mambu bamonikina. Mu thangu beni, Yesu wuba monikina muna nzo baba. Va thonono, basa tela ko mana ti nandi. Diawu Yesu kaba kambila: ‘Talanu ayi simbanu kwinu myoko myami. Dyambu di Nzambi di bikula ti Klisto wala fwa ayi wala vulubuka.’