Ka kíim Jesuseʼ, juntúul ayikʼal máak ku kʼaabaʼtik Joseeʼ tu kʼáataj tiʼ Pilato wa jeʼel u béeytal u luʼsik u wíinklil Jesús bajaʼan teʼ cheʼoʼ. Joseeʼ tu chʼaʼaj u wíinklil Jesuseʼ ka tu bakʼaj yéetel nookʼoʼob beetaʼan yéetel maʼalob lino, kiʼibokkíintaʼan yéetel xíiwoʼob. Ka tsʼoʼokeʼ tu tsʼáaj tiʼ junpʼéel túumben muknal. Tsʼoʼoleʼ tu yaʼalaj ka balkʼesaʼak junpʼéel nuxiʼ tuunich utiaʼal u maʼakal u jool. U nuuktakiloʼob le sacerdoteʼoboʼ tu yaʼaloʼob tiʼ Pilato: ‹Saajkoʼon ka oklaʼak u wíinklil Jesús tumen u disipuloʼob yéetel ka u yaʼaloʼob tsʼoʼok u kaʼa kuxtal›. Pilatoeʼ tu yaʼalajtiʼob: ‹Makeʼex tubeel le muknaloʼ yéetel tsʼáaʼex soldadoʼob kanáantik›.

Ka máan óoxpʼéel kʼiineʼ, le táan u taal u sáastaloʼ bin jujuntúul koʼoleloʼob yiknal le muknaloʼ. Tu yiloʼobeʼ yaan máax péeksmil le tuunich tsʼaʼan tu jooloʼ. Ichil le muknaloʼ tiaʼan kaʼach juntúul angeliʼ, letiʼeʼ tu yaʼalajtiʼob: ‹¡Maʼ a chʼaʼikeʼex saajkil! Jesuseʼ tsʼoʼok u kaʼa kuxkíintaʼal. Aʼaleʼex tiʼ u disipuloʼob ka xiʼik u yiloʼob Galilea›.

María Magdalenaeʼ tu séebaʼanil bin u yil Pedro yéetel Juan, ka tu yaʼalajtiʼob: ‹Yaan máax tsʼoʼok u bisik u wíinklil Jesús›. Pedro yéetel Juaneʼ áalkabil binikoʼob yiknal le muknaloʼ. Ka tu yiloʼob minaʼan mix máakeʼ, suunajoʼob tu yotochoʼob.

Ka tsʼoʼokeʼ Maríaeʼ suunaj yiknal le muknaloʼ, ka chʼeenebnajeʼ tu yilaj yaan kaʼatúul angeloʼobiʼ, ka tu yaʼalajtiʼob: ‹Maʼ in wojel tuʼux bisaʼab u wíinklil in Yuumtsiliʼ›. Ka tsʼoʼokeʼ tu yilaj juntúul máak, tu tukleʼ letiʼe jardinerooʼ. Tu kʼáatajtiʼ: ‹Yuumtsil, wa teech biseʼ aʼalten tuʼux ta tsʼáaj›. Ka tʼaʼan tu kʼaabaʼ tumen le máakoʼ, tu tsʼáaj cuenta Jesús tʼane. Ka tu yaʼalaj: ‹¡J-Kaʼansaj!›, ka túun tu méekʼaj. Jesús túuneʼ tu yaʼalajtiʼ: ‹Xeen tu yiknal in sukuʼunoʼob ka a waʼaltiʼob tsʼoʼok a wilken›. Maríaeʼ bin áalkabil u tsikbalt tiʼ le disipuloʼob tsʼoʼok u yilik Jesusoʼ.

Teʼ kʼiin jeʼeloʼ, kaʼatúul disipuloʼobeʼ lukʼoʼob Jerusalén utiaʼal u binoʼob tiʼ junpʼéel chan kaaj ku kʼaabaʼtik Emaús. Juntúul máakeʼ káaj u bin tu yéeteloʼobeʼ ka tu kʼáatajtiʼob baʼax táan u tsikbaltikoʼob. Letiʼobeʼ tu yaʼaloʼobtiʼ: ‹¿Maʼ wa a wojéelt baʼax úuchiʼ? Tsʼoʼok óoxpʼéel kʼiin túuxtaʼak kíimsbil Jesús tumen u nuuktakil le sacerdoteʼoboʼ. Beoraaʼ jujuntúul koʼoleloʼobeʼ táan u yaʼalikoʼob kuxaʼan Jesús›. Le máakoʼ tu kʼáatajtiʼob: ‹¿Maʼ wa ta creertikeʼex le baʼax u yaʼalmaj le profetaʼoboʼ? Letiʼobeʼ tu  yaʼaloʼob unaj kaʼach u kíimil Cristo ken tsʼoʼokkeʼ yaan u kaʼa kuxkíintaʼal›. Letiʼeʼ seguernaj u tsoliktiʼob u maasil yoʼolal le Kiliʼich Tsʼíiboʼoboʼ. Ka kʼuchoʼob Emauseʼ, le disipuloʼoboʼ tu yaʼaloʼobtiʼ ka pʼáatak tu yéeteloʼob. Le táan u jaanloʼoboʼ, le máakoʼ tu chʼaʼaj junpʼéel waajeʼ ka tu beetaj junpʼéel oración. Bey tu tsʼáajiloʼob cuenta Jesús le máakoʼ. Chéen baʼaleʼ saʼat tu táan u yichoʼob.

Le kaʼatúul disipuloʼoboʼ áalkabil úuchik u binoʼob Jerusalén. Ka kʼuchoʼob teʼ naj tuʼux u muchʼmuba le apostoloʼoboʼ tu tsikbaltoʼob le baʼax úuchoʼ. Le tiaʼanoʼob ichil le najoʼ, Jesuseʼ tu chíikbesuba tiʼob. Tu káajbaleʼ le apostoloʼoboʼ maʼ tu creertikoʼob wa Jesús le máakoʼ. Chéen baʼaleʼ letiʼeʼ tu yaʼalajtiʼob: ‹Ilawileʼex in kʼaboʼob, macheneʼexiʼ. Tsʼíibtaʼaniliʼ yaan u kaʼa líiʼsaʼal le Cristo ichil le kimenoʼoboʼ›.