Despué de gutiʼ Jesús, ti hombre ricu láʼ José yetidxi Poncio Pilato pa zanda guindeteʼ cuerpu stiʼ Jesús lu maderu que. Bichéndabe Jesús lari de ni jma galán, guluube caadxi guixi rindaʼ naxhi ndaaniʼ lari que ne bicaachibe laa ndaaniʼ ti baʼ ra guirutiʼ qué huagaachiʼ. De raqué biʼniʼ mandarbe cúʼcabe ti guié ruaa baʼ que. Ca sacerdote principal que gúdxicaʼ Poncio Pilato: «Nuudu xizaa pa cuee ca discípulo stiʼ Jesús cuerpu stibe ne guiniʼcaʼ maʼ biásabe de lade gueʼtuʼ». Ngue runi gudxi Poncio Pilato laacabe: «Laguseeguʼ chaahuiʼ ruaa baʼ ca ne laguseendaʼ guardia gapa ni».

Chonna gubidxa despué, siadóʼ roʼ guyé caadxi gunaa ra baʼ que. Bidiicabe cuenta guyuu tuuxa gulee guié daʼguʼ ruaa baʼ que ne zuxeleʼ ni. Ndaaniʼ baʼ que nuu ti ángel, ne gudxi laacabe: «Cadi guidxíbitu. Maʼ biasa Jesús de lade gueʼtuʼ. Lagabi ca discípulo stiʼ Jesús checaʼ Galilea, raqué zadxaagalucaʼ laabe».

Nagueendaca guyé María Magdalena yeyubi Pedro ne Juan, ne gúdxibe laacaʼ: «Maʼ zinécabe cuerpu stiʼ Jesús». Biree guxooñeʼ Pedro ne Juan zecaʼ ra baʼ que. Ora yendacaʼ raqué biiyacaʼ guirutiʼ nuu ndaaniʼ baʼ que, ne bibiguétacaʼ ra lídxicaʼ.

Despué, bibiguetaʼ María ra baʼ que, biiyabe chupa ángel ndaaniʼ ni ne gúdxibe laacaʼ: «Qué gannaʼ paraa zinécabe Señor stinneʼ». Óraque biiyabe ti hombre, zácaxabe ti jardineru laa, ne gunabadiidxabe laa: «Gudxi naa paraa gudíxheluʼ laabe». Hombre que bicabi laabe: «¡María!», bidiicaʼ María cuenta Jesús ngue caniʼné laa. Para gúdxibe laa: «¡Maestru!» ne biábabe xañee. Jesús gudxi laabe: «Yetidxi ca bicheʼ maʼ biiyaluʼ naa». Biree guxooñeʼ María zeʼ ra nuu ca discípulo stiʼ Jesús ne gúdxibe laacaʼ maʼ biiyabe Jesús.

Huadxí queca, biree chupa discípulo stiʼ Jesús de Jerusalén zecaʼ Emaús. Málasi bidxiña ti hombre ra nuucabe ne gunabadiidxaʼ laacabe xidé caníʼcabe. Bicábicabe laa: «¿Ñee qué gánnaluʼ la? Raca chonna gubidxa, biseendaʼ guuti ca sacerdote principal Jesús. Yanna caníʼ caadxi gunaa maʼ biásabe de lade gueʼtuʼ». Hombre que  gunabadiidxaʼ laacabe: «¿Ñee qué runi cretu ni guníʼ ca profeta la? Laacaʼ guniʼcaʼ naquiiñeʼ gatiʼ Cristu ne guiasa de lade gueʼtuʼ». De raqué, bisiénerube laacaʼ xcaadxi cosa ni cá lu Xquiʼchiʼ Dios. Ra yendácabe Emaús, gunabaʼ ca discípulo que guiaananebe laacaʼ. Ora chitoxhícabe, bíʼnibe ti oración pur pan que, ne óraque bidii ca discípulo que cuenta hombre que nga Jesús. Despué de ngue, maʼ qué ñuuyacabe laabe.

Biree guxooñeʼ ca discípulo que zecaʼ Jerusalén. Yendácabe ra yoo ra guca reunir ca apóstol que ne gúdxicabe laacaʼ ni guca que. Laga nuucabe raqué málasi bihuinni Jesús. Qué ni ná ga ca apóstol que ñuni crecaʼ pa laabe nga Jesús. Peru laabe gúdxibe laacaʼ: «Laguuyaʼ batanayaʼ ne lacaʼnaʼ naa. Maca cá ziasa Cristu de lade gueʼtuʼ».