Tingbafuo Yesu kpi, kura kumukokumuko kumba rimoko angia Yosefa asana Pirato tipa ka dia kangba Yesu ti ngua. Yosefa akai kangba ko na wene roko na ki vudihe na wene fuo anzeme ki pigihe rogo vovo murö. Ko ki wirigi bambia kuti ngbadimo murö. Agbiamotumo aya fu Pirato wẽ: ‘Ani nagunde agunde nga kura ga Yesu abawiriki nika ye ka dia kangbako ki gumba gupai nga ko ima karagatiko berewe ni ungako.’ Sidu, Pirato aya fuyo: ‘Oni me ngbadimo murö na kini bandaha.’

Fuo arame biata kusa, bete adee andu kina boro ngbawiso ku pati murö yo ki bi gupai nga i ima wirigo mbia kusayo ti ngbadimoho. Vuru murö yo Maraika agumba gupai fu agu adee re nga: ‘Ka oni gundenga ya. I ima zingisa Yesu. Oni ndu ka gumbaha fu gako abawiriki nga i ndu ka gbiako Gariraya yo.’

Maria Magadara aipisi tiri ka ndu ka gbia aPetero na Yoane. Ri aya fuyo: ‘Boro ima dia kangba Yesu!’ Petero gbiati Yoane aoro berewe ku pati murö yo. Ho i abi gupai ni nga si ni kungboho, i akaragatiyo ku rogo akpuyo.

Ho Maria akaraga tiri ni berewe kupati murö yo, ri abi amaraika ue rogo gu murö re ki ya fuyo: ‘Mi ainongo wari i nandu na gi Gbia kuhoni te.’ Fuoho, ri abi kumba ri ki berẽhe tigari nga basopobino nangia ko ri ki ya fuko: ‘Gbia mi nazungodi ro mo gumbanga pa wari fere mo nandu na ko kuhoni.’ Ono ho gu kumba re aya ni wẽ, “Maria!” Ri aini gupai nga Yesu du nga ko. Ri apoi kuari ki ya: ‘Bayugupai!’ ri ki dungo ko. Yesu ki ya furi: ‘Mo ndu ki gumbaha fu awirinami nga mo ima bi re.’ Nibasa, Maria aoro fuo abawiriki na ki gumba gupai fuyo nga ri ima bi Yesu.

Kusa rogo gu uru re, Abawiriki ue aguari Yerusarema yo ka ndu ku Emau yo. Kura kumba agbia yo gene ki sanayo tipa gupai i naafura tipaha. I ki ya: ‘Mo agianga gupai nasusa te? Arame biata kusayo, agbiamotumo aimi Yesu. Awere kura adee nagumba gupai nga ko ni kina ungako!’ Gu kumba re asanayo nga: ‘Oni aidanga kuti sangbaanebi te? I ki ya si adu nga Kristo nika kpi i ki zingisi ko.’  Gu kumba re kindi ndu kumbatayo nasakarogo Ziazia Kekeapai yo fuyo. Ho i ada ni Emau yo, agu abawiriki re aya fu gu kumba re wẽ ko ongodi fuoyo. Tingbafuo ko kparikpee kurii kpakuto ti regbo gu riahe nga ga nyemu, i aini gupai nga Yesu du. Fuoho, ko ki ingi beyo.

Agu abawiriki ue re aipisi tiyo ku rogo gu kporo naadu Yerusarema yo yo amokedi adunguratiyo kuhoni na ki gumba gupai fuyo namangi. Ho i adu ni dimoyo, Yesu ayugu tiko fuyo dunduko. Ti tonatonaha amokedi aaidanga kuti gupai nga Yesu du naadu te. Sidu, ko aya fuyo: ‘Oni bi abere; oni zadi re. Si adu ni kekehe ya Kristo nika zingabekpio.’