Nindo moko i ng’ei ma Yesu unyuthere ni jukwenda, Petro ung’io nia kwayu ecidh edwar rec i nam mi Galilaya. Thoma, Yakobo, Yohana man julub mange de gicidho karacelo kude. Gidwaru rec traka, ento gimaku ngo kadok acel de.

Urwonde pir kugweno, gineno ng’atu moko ma co ucungo i dhu wat. Egam elwong’ogi kud i dhu wat, eyero igi kumae: ‘Wumaku rec moko de?’ Gidwoko ire nia ‘ungo!’ E ng’atune uyero igi kumae: ‘Wubol voi i ng’et yei ma yor acwic.’ Kinde ma gibolo voi, rec umoko i voine bik ma giromo tele ngo i yei. Yohana unyang’ ndhu nia ng’atu maeno utie Yesu man eyero kumae: “En e Rwoth!” Wang’ acel, Petro upiei i pii man ekwang’ nitundo i dhu wat. Julub mange gilubo toke ku yei.

Kinde ma ginyiko ku yei i dhu wat, gineno mukathi ku rec iwi mac. Yesu uwacu gimii kum rec migi moko gimedi i kum cam. I ng’eye, ewacu igi nia ‘gibin gicam.’

 Kinde ma gidaru cam, Yesu upenjo Petro kumae: ‘Nyo imara ma sagu dwaru rec?’ Petro udwoko kumae: “Eyo, Rwoth; ing’eyo nia ameri.” Yesu uwacu ire kumae: ‘Dong’ mii cam ni nyithi rombe para.’ Yesu upenje kendo kumae: ‘Petro, nyo imara?’ Petro udwoko kumae: “Rwoth; ing’eyo nia ameri.” Yesu uyero ire kumae: “Kwai rombe para.” Yesu upenje wang’ mir adege. E can umondo i Petro lee mandha. Egam edwoko ni Yesu kumae: “Rwoth, ing’eyo gin ceke; ing’eyo nia ameri.” Yesu uwacu ire kumae: “Mii cam ni rombe para.” I ng’eye, eyero ni Petro kumae: “Lub ng’eya.”